बाजुरा : नेकपा एमालेका अध्यक्ष एवम् पूर्व प्रधानमन्त्री केपी शर्मा ओलीको ७१ औं जन्मोत्सवको अवसरमा उहाँका दृष्टान्त, भनाइ र विचार समेटिएको पुस्तक ‘समवेत दृष्टि’ सार्वजनिक गरिएको छ । बुधबार भक्तपुरमा आयोजित एक भव्य समारोहमा ओली, उहाँका पिता मोहनप्रसाद ओली र पत्नी राधिका शाक्यद्वारा संयुक्त रूपमा पुस्तक लोकार्पण गरिएको हो ।

संजय खड्का र लोग्शरी कुँवरद्वारा संकलक तथा सम्पादन गरिएको उक्त पुस्तक ओलीले विभिन्न कालखण्डमा व्यक्त गरेका विचार तथा मन्तव्यहरूको सारग्राही सङ्ग्रह हो । सङ्ग्रह मूलतः छ खण्डमा वर्गीकरण गरिएको छ । 

पहिलो खण्डमा ओलीद्वारा रचित कविता तथा गीत छन् । दोस्रो खण्डमा उहाँका सूक्तिहरूको एकत्रीकरण हो जसलाई ‘भनाइ’ भन्ने शीर्षक दिइएको छ । तेस्रो र चौथो खण्डमा उहाँले आफ्ना भाषणमा प्रयोग गर्नुभएका ‘दृष्टान्त’ र ‘कथा’ छन् ।

पाँचौँ खण्डमा ‘मेरो आकाङ्क्षा,  "समृद्ध नेपाल, सुखी नेपाली" रहेको छ । विभिन्न विषयवस्तुमा उहाँका भावना, दृष्टिकोण र चिन्तनलाई छैटौँ खण्ड ‘विचार’मा समेटिएको छ । पुस्तकमा अभिव्यक्त विचार तथा दृष्टान्त कुन सन्दर्भमा, कुन अर्थमा कहिले बोलिएको हो भन्ने कुरा पाठक वर्गलाई बुझ्न सजिलो होस् भन्ने हेतुले पुस्तकको अन्तिममा पाद–टिप्पणी राखिएको छ ।

पुस्तक लोकार्पण कार्यक्रममा नेपाल प्रज्ञा प्रतिष्ठानका उपकुलपति डा. जगमान गुरुङ, पूर्व राजदूत डा.निलाम्बर आचार्य र साहित्यकार स्नेह सायमीले पुस्तकबारे समिक्षा गर्नुभएको थियो ।