पूर्वमिस नेपालहरुले सामाजिक अभियान सुरु गरेका छन् । हालसम्मका २५ पूर्वमिस नेपालहरुले ‘फर्मर मिस नेपाल विनर क्लब’ गठन गरी सामाजिक अभियान सुरु गरेका हुन् । यसमा मानसिक स्वास्थ्यदेखि विपन्नलाई छात्रवृत्ति प्रदान गर्नेसम्मको योजना उनीहरुले अघि सारेका छन् ।

सबै पूर्वमिस नेपालहरुलाई एउटै छातामा आबद्ध गर्ने उद्देश्यले गठन गरिएको यो क्लबले सामाजिक कार्यमा सक्रियता जनाउने भएको छ । रुबी राणादेखि अनुष्का श्रेष्ठसम्म सहभागी रहेको क्लबले हालै मानसिक स्वास्थ्यको क्षेत्रमा सचेतना जगाउने काम सुरु गरेको छ । विपन्नलाई आर्थिक सहयोग दिलाउन कोष जम्मा गर्ने कार्य पनि चलिरहेको छ ।

गत साता सडकमा तरकारी बेच्दै आइरहेकी एक महिलालाई क्लबमार्फत नै ठेला सहयोग गरिएको छ । कोभिड-१९ ले बाबुआमा गुमाएका विपन्न विद्यार्थीलाई कलेज तहसम्म पढ्ने छात्रवृत्तिको व्यवस्था पनि मिस नेपालहरुले सुरु गरेका छन् ।

छात्रवृत्तिको प्रक्रिया सुरु भएको र चाँडै आवेदन आह्वान पनि गर्ने जनाइएको छ । ‘यस क्लबले मिस नेपालहरुलाई आफ्नो कार्यकालपछि पनि सामाजिक क्षेत्रमा सक्रिय रहन मद्दत गर्नेछ,’ पूर्वमिस नेपाल सृष्टि श्रेष्ठले अनलाइनखबरसँग भनिन् ।

यति मात्र होइन, पूर्वमिस नेपालहरु मिलेर गेट-टुगेदर र सेलिब्रेसन कार्य समेत हुन थालेको छ । सन्तानलाई जन्म दिने तयारीमा रहेकी पूर्वमिस नेपाल जेनिशा मोक्तानको ‘बेबी सावर’मा सबै पूर्वमिस नेपालहरु सहभागी भएका थिए ।