बाजुरा: नेकपा (एमाले) जिल्ला कमिटीको बाजुराको अधिवेशन तयारी बैठक बिहीबार बस्ने भएको छ । आगामी चैत १६ र १७ गते हुने आठौं जिल्ला अधिवेशनको अन्तिम तयारीका लागि बैठक बस्न लागेको पार्टी सचिव काँशी विकले बताउनुभएको छ । 

बैठकका लागि बाजुरा जिल्ला ईन्चार्ज भैरव बहादुर सिंह सहित नेताहरु जिल्ला सदरमुकाम मार्तडी पुगिसकेका छन् । बैठकका लागि अन्य जिल्ला स्तरका नेताहरु यतिबेला जिल्ला केन्द्रीत बनेका छन् ।

बैठक बसेर सम्पूर्ण तयारी सुरु गरिने र तोकिएकै समयमा अधिवेशन हुने पार्टी उपसचिव हरि बहादुर रोकायाले बताएका छन् । संगठीत सदस्यताको वडागत सूची तयारी पार्ने, लोगो र नारा तय गर्ने, प्रचार देखि अन्य व्यवस्थापनका लागि उपसमिति गठन गरी कामका लागि आन्तरिक गृहकार्य सुरु गरिने उनले बताएका छन् ।

यसअघि चैत्र १६ र १७ गते आठौं जिल्ला अधिवेशनको मिति घोषणा गरिएसंगै तयारीको लागि अधिवेशन केन्द्रीत बैठक बस्न लागेको एक नेताले बताएका छन् । अधिवेशन तयारीका लागि विभिन्न समिति उपसमिति बनाएर तीव्र तयारी गरिने बताईएको छ । आगामी चैत्रमा हुने अधिवेशनका लागि बाजुरा एमालेमा दुई जनाको दाबेदारी बलियो देखिएको छ ।

पदपूर्तिबाट अध्यक्ष बनेका भरत थापा र लालबहादुर ओली प्रमुख आकांक्षी देखिएका छन् । एमाले केन्द्रीय प्रतिनिधी परिषद् सदस्य रंगमान शाहीले पनि रुचि देखाएका छन् । तर अन्तिममा चुनाव नै हुने अवस्था आए भरत थापा र लालबहादुर ओली बीच नै हुने देखिएको छ ।

थापा अध्यक्षको जिम्मेवारी पाइसकेपछि फेरि एक कार्यकाल त्यही पदका लागि निरन्तरता हुनुपर्ने अडानमा हुनेछन् । भने ओली दशक पहिला देखिको अध्यक्षको उम्मेदवारीलाई यो पटक निर्णायक बनाउने मनस्थितिमा देखिएका छन् । सबैभन्दा कडा प्रतिस्पर्धा अध्यक्षमै हुने देखिएको छ ।

पार्टी जिल्ला अध्यक्षका लागि बाजुरामा हालसम्म चुनाव भएको छैन् । यो पटक सहमतिको सम्भावना निकै कम देखिएकोले चुनाव हुने तयारीका लागि दुबै जना नेता लागि परेका छन् । दुई टिम बनाएर नै चुनावी प्रतिस्पर्धा हुने अनुमान कतिपयले गरेका छन् ।