काठमाडौं : एमालेकी पूर्वउपाध्यक्ष करिब १० वर्षपछि पहिलो पटक पार्टी कार्यालय जाने भएकी छन्। राष्ट्रपति बनेपछि एमालेको उपाध्यक्ष पदबाट राजीनामा दिएकी  विद्यादेवी भण्डारी आज दिउँसो ३ बजे एमाले पार्टी केन्द्रीय कार्यालय च्यासल जान लागेकी हुन्।

धुम्बाराहीमा पार्टी कार्यालय हुँदा राष्ट्रपति बनेकी भण्डारी च्यासलमा पार्टी कार्यालय बनेपछि पहिलो पटक जान लागेकी हुन्। एमाले अध्यक्ष एवम् प्रधानमन्त्री केपी शर्मा ओलीसँग भेटवार्ता गर्न भण्डारी च्यासलमा आज दिउँसो ३ बजे आउने प्रधानमन्त्री सचिवालयले जनाएको छ।

भण्डारी २०७२ साल कार्तिक ११ गते पहिलो पटक राष्ट्रपतिमा निर्वाचित भएकी थिइन्। भण्डारीपश्चात २०७९ साल फागुन २९ गते रामचन्द्र पौडेलले पद तथा गोपनियताको शपथ ग्रहण गरेर पदभार सम्हालिरहेका छन्।

उनले केही समय अगाडि एमालेको राजनीतिमा आउने घोषणा गरेकी थिइन् तर पार्टीले औपचारिक निर्णय गरेको छैन। यता एमालेको पोलिटब्युरो बैठकले पूर्वराष्ट्रपति विद्यादेवी भण्डारीको पार्टी सदस्यता ‘होल्ड’ मा राख्ने निर्णय गरेको थियो।

पूर्वराष्ट्रपतिको हैसियतामा पाउने सबै सेवा सुविधा छोडेर सक्रिय राजनीतिमा प्रवेश गरेकी भण्डारीको सदस्यता नवीकरणको विषयमा पार्टीले पछि निर्णय गर्ने गरी हाललाई पेन्डिङमा राख्ने निर्णय भएको प्रचार विभाग प्रमुख राजेन्द्र गौतमले जानकारी दिए ।

बैठकका निर्णय सुनाउँदै प्रचार विभाग प्रमुख गौतमले भने, ‘गरिमामय पदमा पुगेको व्यक्ति एउटा पार्टी विशेषको नेता भएर आउँदा के हुन्छ भन्ने विषयमा गम्भीर छलफल भयो । पार्टीमा आउने कुराले के प्रभाव पर्छ भनेर धेरै कुरा उठे । कमिटीको गम्भीर ध्यानाकर्षण भयो ।

अध्यक्षले पनि अर्को बैठकमा यो विषयमा छलफल गरौं भन्नुभएको छ ।’ अध्यक्ष ओलीले बैठक समापनमा बोल्दै भण्डारीसँग छलफल गरेर पार्टी सदस्यता बारेको विषय टुंग्याउने बताएका थिए। पूर्वराष्ट्रपतिले पार्टीको सदस्यता लिने विषयलाई लिएर पक्ष-विपक्षमा बहस भइरहेका छन्।

एमाले नेता शेरबहादुर तामाङले राष्ट्रपति भइसकेको व्यक्ति पार्टी कार्यालयमा आउनु स्वभनीय नभएको उल्लेख गरे। उनले भने, ‘हामीलाई समस्या भयो। राष्ट्रपति भएको मान्छे पार्टी कार्यालय जानु गणतन्त्रको हुर्मत हो। गणतन्त्र सेम्बल, पार्टी कार्यालय कार्यालय धाउनु, मलाई सदस्यता दिनु भन्दै पार्टी कार्यालय जानु उपयुक्त र सुहाउँदो कुरा होइन।’