बाजुरा ः गौमुल गाउँपालिका-६ बसालामा रहेको घटाल आधारभूत विद्यालयमा विजया दशमी तथा शुभदीपावलीको अवसरमा खुला भलिबल प्रतियोगिता सहित बृहत् डेउडा प्रतियोगिता तथा विविध सांस्कृतिक कार्यक्रम आयोजना हुने भएको छ।

विद्यालयमा कार्तिक ५ गतेदेखि ७ गतेसम्म सञ्चालन हुने कार्यक्रममा पुरुष तथा महिला भलिबल प्रतियोगिता, बृहत् डेउडा प्रतियोगिता, विद्यालयका सदनात्मक नृत्य र वडा स्तरबाट स्वतन्त्र प्रतिभा प्रस्तुति लगायतका कार्यक्रम समावेश गरिएका छन्।

विद्यालयका प्रधानाध्यापक हर्कबहादुर थापाका अनुसार कार्तिक ५ र ६ गते खेलकुद गतिविधि सञ्चालन गरिनेछ भने कार्तिक ७ गते औपचारिक कार्यक्रम सहित भव्य सांस्कृतिक कार्यक्रम आयोजना गरिनेछ।

प्रतियोगिता अन्तर्गत पुरुष भलिबलतर्फ टिम दर्ता शुल्क ३ हजार रुपैयाँ र महिलातर्फ १ हजार रुपैयाँ निर्धारण गरिएको छ। पुरुषतर्फ विजेता टिमले २१ हजार १११ रुपैयाँ र उपविजेता टिमले १३ हजार ३१३ रुपैयाँ पुरस्कार प्राप्त गर्नेछन्।

त्यसैगरी, महिला भलिबलतर्फ विजेता टिमलाई ५ हजार १११ रुपैयाँ र उपविजेता टिमलाई ३ हजार १११ रुपैयाँ पुरस्कार प्रदान गरिने आयोजकले जनाएको छ।

खेलकुदसँगै मौलिक डेउडा, नृत्य र स्वतन्त्र प्रतिभा प्रस्तुति मार्फत स्थानीय कला, संस्कृति तथा प्रतिभाको पहिचान र प्रवर्द्धन गर्ने कार्यक्रमको उद्देश्य रहेको छ।

यस्ता गतिविधिले युवाको खेलकुदप्रतिको आकर्षण बढाउनुका साथै आपसी सद्भाव, भाइचारा र सामाजिक एकता मजबुत बनाउन सहयोग पुग्ने अपेक्षा गरिएको छ।

विद्यालयमा आयोजना हुन लागेको यस कार्यक्रमले दसैँ-तिहारको उल्लासलाई थप उत्साहपूर्ण बनाउनुका साथै स्थानीय प्रतिभालाई आफ्नो क्षमता प्रदर्शन गर्ने अवसर प्रदान गर्ने विश्वास गरिएको छ।