बाजुरा: गौमुल गाउँपालिकाका उपाध्यक्ष तथा अनुगमन समिति संयोजक सीता थापाले निर्माण कार्य सम्पन्न भएका विभिन्न योजनाहरुको आज अनुगमन गर्नुभएकाे छ ।

आज गौमुल गाउँपालिका–१, २ र ३ नम्बर वडामा सञ्चालित योजनाको संयुक्त रुपमा अनुगमन गर्नुभएको हो । निर्माण कार्य सम्पन्न भएका योजनाहरुको गुणस्तर र प्रभावकारिता बारेमा निर्माण स्थलमा पुगेर प्राविधिक सहित लिएर मुल्याकंन गरिएको छ ।

गाउँपालिकाको केन्द्र घट्मुनाबाटसियाढुंगा हुदैं वडा नम्बर १ अम्लिस जोड्ने सिम सम्मको सडक मर्मत योजना, गाउँपालिका र आई.एन.एफ.नेपालको साझेदारीमा लगानी गरिएको मालेखराको गोरेटो बाटोको प्रत्यक्ष स्थलमा गएर अनुगन गर्नुभएको छ ।

यस्तै गौमुल गाउँपालिका–२ को तुसारीगाड लघुजलविद्युत आयोजना उपभोक्ता समितिको नहर निर्माण योजनाको समेत अनुगमन गरिएको छ ।

त्यस्तै ग्रेनीघाटदेखि वडा नम्बर ३ को वडा कार्यालय माझपालीसम्म जोड्ने सडक निर्माणको अवस्थाका बारेमा अनुगमन गरिएको हो ।

अनुगमनका क्रममा योजनामा स्टमेट अनुसार काम भए नभएको तथा गुणस्तरीय भए नभएको मुल्याकंनका आधारमा ठेकेदार कम्पनीलाई भुक्तानी गरिने अनुगमन समितिको भनाई रहेको छ ।

कतिपय योजनाहरुको गुणस्तर राम्रो रहेको पाईएका कारण प्राविधिकहरुले पूर्व स्टमेट गरे अनुसार काम गरिनुपर्ने अनुगमन समिति संयोजक सीता थापाले बताउनुुभएको छ ।

स्थानीय सरकारले निर्माण गरेका कतिपय योजनाहरुको गुणस्तरमा सबैले ध्यान दिन आवश्यक रहेको बताउँदैं अपनत्वको भावनाको विकास सबैमा जागृत हुनुपर्नेमा जोड दिनुभएको छ ।

गौमुल गाउँपालिका इन्जिनियर धर्म खडायत सहित लिएर उपाध्यक्ष थापा योजना निर्माण स्थलमा पुग्नुभएको हो । अनुगमन पश्चात् मात्र ती निर्माण सम्पन्न गरिएका सम्पूर्ण योजनाहरुको भुक्तानी गरिने भएको छ ।

अनुगमनमा उपाध्यक्ष सीता थापा, वडा अध्यक्ष गोरख बोहरा, वडा सदस्य प्रेम रोकाया, इन्जिनियर धर्म खडायत, रेडियो गौमुलका स्टेशन प्रबन्धक रमित विक, प्राविधिक अर्जुन रोकाया लगायतको सहभागीता रहेको थियो ।