बाजुरा : गौमुल गाउँपालिकाले आफ्नो हिउँदे गाउँ सभा विभिन्न नीति तथा कार्यक्रमका साथ सम्पन्न भएको छ । मंगलबार हिउँदे गाउँसभाले गाउँपालिकाको अर्धवार्षिक प्रगति प्रतिवेदन सार्वजनिक, खर्चतर्फको प्रगति बारे जानकारी गरिएको छ ।

एक दिनका लागि सञ्चालन भएको गाउँ सभाले ऐन, नियम, नियमावली र निर्देशिका पारित गर्दै कानुनी बाधा–अड्चन समेत फुुकाएको हो ।

यसवर्षको खर्चतर्फ चालुखर्च तर्फ विनियोजन २६ करोड ३७ लाख ६५ हजार रूपैया मध्ये खर्च ६ करोड ६० लाख ६३ हजार ८ सय ८९ रूपैया ८७ पैसा खर्च भएको छ भने कुल विनियोजनको २५ दशमलव ०५ प्रतिशत खर्च भएको छ ।

त्यसैगरी पुँजीगत खर्चतर्फ विनियोजन भएको १०  करोड १८ लाख ६२ हजार मध्ये ३८ लाख २९ हजार ४ सय ३८ रूपैया ८० पैसा खर्च भएको छ । जुन विनियोजनको ३ दशमलव ७६ प्रतिशत भएको छ ।

हाल सम्मको कूल खर्च रु ६ करोड ९८ लाख ९३ हजार ३ सय २८ रुपैया ६७ पैसा खर्च भएको छ । जुन विनियोजनको १९ दशमलव ११ प्रतिशत रकम खर्च भएको गाउँ सभा सदस्य सीता थापाले प्रस्तुत गरेकी हुन् ।हिउँदे गाउँसभाले आगामी आर्थिक वर्ष ०८२/०८३ को लागि प्रस्तावित बजेट प्रक्षेपण गरेको छ ।

जसमा प्रस्तावित आयतर्फ ४२ करोड ७१ लाख ८९ हजार ७ सय, जसमा आन्तरिक आम्दानी ६० लाख, संघिय सरकारबाट अनुदान ३४ करोड २९ लाख ७० हजार १ सय, प्रदेश सरकारबाट अनुदान ७ करोड ८२ लाख १९ हजार ६ सय गरिएको छ ।

यस्तै व्ययतर्फ अनुमानित चालु खर्च २९ करोड ५१ लाख ४१ हजार ५ सय, पुँजीगत खर्च १३ करोड २० लाख ४८ हजार २ सय, क्षेत्रगत प्रस्तावित बजेट प्रक्षेपण छ ।

यसैबीच आर्थिक विकास तर्फ ३ करोड ५३ लाख ७६ हजार, सामाजिक विकासतर्फ १३ करोड १० लाख ५४ हजार, पूर्वाधार विकास तर्फ रु ६ करोड ३२ लाख ४८ हजार २ सय, सुशासन तथा अन्तरसम्बन्धित क्षेत्रतर्फ ९७ लाख ३९ हजार ४ सय, कार्यालय सञ्चालन तथा प्रशासनिकतर्फ १७ करोड ७७ लाख ७२ हजार १ सय रुपियाँको प्रक्षेपण गरिएको छ ।

सभामा प्रस्तुत भएका नीति कार्यक्रम र प्रक्षेपण गरिएको बजेट सभामा सभाअध्यक्ष हरि बहादुर रोकायाले निर्णायार्थ पेश गरेसंगै सभाका बहुमत सदस्यले पास गरेका हुन् ।

दोस्रो गाउँ सभाको छैटौं अधिवेशनमा गाउँ सभाका सदस्य, प्रमुख प्रशासकीय अधिकृत जगदीश प्रसाद भट्ट लगायत कर्मचारी र पत्रकारहरुको सहभागीता रहेको थियो ।