बाजुरा : नेकपा एमाले गौमुल गाउँ कमिटीले जिल्ला कमिटीमा निर्वाचित सदस्यहरुलाई बधाई ज्ञापन गरेको छ । आज एक औपचारिक कार्यक्रमकाबीच आठौं जिल्ला अधिवेशनबाट निर्वाचित जिल्ला कमिटी सदस्यहरुलाई बधाई तथा कार्यकालको शुभकाना दिईएको हो ।

कार्यक्रममा अधिवेशनबाट निर्वाचित सदस्य गोरख बोहरा, धनलक्ष्मी जैशी, गिता रोकाया, देवबहादुुर रोकाया, देबेन्द्र बहादुर रोकाया, अमर विक, राजिव बहादुर रोकाया र चित्रा बाेहरालाई अविर लगाएर बधाई ज्ञापन गरिएको गाउँ कमिटी सचिव मोहन रोकायाले बताएका छन् ।

नेकपा एमाले प्रदेश कमिटी सदस्य कलक सिंहले अविर खादा लागाएर निर्वाचित सदस्यहरुलाई बधाई दिएका हुन् । गाउँ कमिटीको नियमित बैठक तथा बधाई कार्यक्रममा महत्वपूर्ण निर्णयहरु समेत गरिएको छ । गाउँ कमिटीको दोस्रो अधिवेशनको मिति तय गरिएको छ । अधिवेशन जेठ २६ गते गर्ने निर्णय गरिएको सचिव रोकायाले बताए ।

त्यस्तै जेठ २४ गतेभित्र अधिवेशनका लागि प्रतिनिधी छनोट गरि सक्नुपर्ने निर्णय गरिएको छ । दोस्राे अधिवेशनका लागि व्यापक तयारी थाल्ने र सफल रुपमा अधिवेशनलाई सम्पन्न गर्न नेता तथा कार्यकर्तालाई सक्रिय रुपमा लाग्न आग्रह समेत गरिएको छ । 

अधिवेशनका लागि निर्वाचन मण्डल गठन, साँस्कृतिक प्रस्तुती तयारी समिति गठन, प्रतिनिधी व्यवस्थापन समिति गठन, खाद्य तथा आवास व्यवस्थापन समिति गठन र आयोजनक मुल समिति गठन गरिएको छ ।

कार्यक्रममा आठौँ जिल्ला कमिटी सदस्यमा निर्वाचित सदस्यहरुले आफूहरुलाई जिल्ला कमिटीमा निर्वाचित गराउँन सहयोग गर्ने सबैलाई धन्यवाद दिएका छन् । अब पार्टी र संगठनलाई बलियो बनाउँन कटिवद्ध भएर लाग्ने बताएका छन् । आफूहरुले पाएको जिम्मेवारी पूरा गर्ने प्रतिवद्धता समेत व्यक्त गरेका छन् ।

कार्यक्रममा नेकपा एमाले प्रदेश कमिटी सदस्य कलक सिंहले पार्टीलाई बलियो बनाउँन सबैले लाग्नुपर्नेमा जोड दिएका छन् । समृद्धि नेपाल, सुखी नेपालीको राष्टिय आकांक्षा पूरा गर्न नेता, कार्यकर्ता र सामाजिक सेवामा जोडिएका सबै बिच सहकार्य हुनपर्ने आवश्यक रहेको बताए । उनले गाउँ, टोल कमिटीहरु विस्तार गरी मिसन ८४ केन्द्रीत हुन समेत आग्रह गरेका छन् ।   

नेकपा एमाले गौमुल गाउँ कमिटी सचिव मोहन रोकायाको अध्यक्षतामा सञ्चालन भएको कार्यक्रमको प्रमुख अतिथि प्रदेश कमिटी सदस्य कलक सिंह रहनुभएको थियो । भने विशिष्ट अतिथिमा सिचाई विभाग सदस्य सगुने रोकाया रहनुभएको थियो । 

त्यस्तै अतिथिमा एमाले जिल्ला कमिटी सदस्य गोरख बोहरा, धनलक्ष्मी जैशी, गिता रोकाया, देवबहादुुर रोकाया, देबेन्द्र बहादुर रोकाया, अमर विक र राजिव बहादुर रोकाया रहेका थिए । गाउँ कमिटी उपसचिव धन बहादुर रोकायाले सञ्चालन गरेको कार्यक्रममा जिल्ला कमिटी, गाउँ कमिटी, वडा कमिटी, टोल कमिटीका पदाधिकारी लगायत नेता तथा कार्यकर्ताको उपस्थित रहेको थियो ।