बाजुरा ःगौमुल गाउँपालिका-२ मा रहेको छेडेतोली पाटन पछिल्लो समय पर्यटकीय सम्भावना बोकेको आकर्षक गन्तव्यका रुपमा चर्चामा आउन थालेको छ ।

प्राकृतिक सौन्दर्यले भरिपूर्ण यस क्षेत्रमा पर्यटकीय गतिविधि विस्तार गर्न सके आन्तरिक तथा बाह्य पर्यटक आकर्षित गर्न सकिने स्थानीयको अपेक्षा छ ।

गौमुल गाउँपालिका प्राकृतिक, धार्मिक तथा ग्रामीण पर्यटनका दृष्टिले सम्भावना बोकेको क्षेत्र हो । गाउँपालिकाले यस अघि पालिकाभित्र रहेका विभिन्न पर्यटकीय क्षेत्रको अध्ययन, अवलोकन तथा प्रवर्द्धन गर्ने प्रयास समेत गरेको थियो ।

त्यसैक्रममा छेडेतोली पाटनलाई पनि पर्यटनको सम्भावनायुक्त क्षेत्रका रुपमा अघि सार्न सकिने देखिएको छ । विशेषगरी प्राकृतिक भू-दृश्य, खुला पाटन क्षेत्र र ग्रामीण परिवेशलाई पर्यटनसँग जोड्न सके छेडेतोली पाटन स्थानीय तथा बाह्य पर्यटकका लागि नयाँ गन्तव्य बन्न सक्ने सम्भावना छ ।

गौमुलमा रहेका यस्ता प्राकृतिक सम्पदाको संरक्षणसँगै व्यवस्थित पर्यटन विकास गर्न सके स्थानीयस्तरमा रोजगारी र आय आर्जनका अवसर समेत सिर्जना गर्न सकिने स्थानीयको विश्वास छ ।

पर्यटकको आगमन बढेमा स्थानीय उत्पादन, होमस्टे, कृषि तथा पशुपालनसँग जोडिएका वस्तुको बजार विस्तारमा समेत सहयोग पुग्न सक्छ ।

छेडेतोली पाटनको वास्तविक पर्यटकीय सम्भावना पहिचान गर्न विस्तृत अध्ययन तथा अभिलेखीकरण गर्नु पनि उत्तिकै महत्वपूर्ण हुनेछ ।

गौमुल गाउँपालिकाले आफ्नो क्षेत्रभित्र रहेका सम्भावित पर्यटकीय गन्तव्यको पहिचान, संरक्षण र प्रवर्द्धनलाई प्राथमिकतामा राख्न सके छेडेतोली पाटनसँगै अन्य प्राकृतिक तथा सांस्कृतिक क्षेत्रलाई समेटेर पर्यटन सर्किट विकास गर्न सकिने सम्भावना छ ।

स्थानीय तहको योजनाबद्ध पहल, प्रदेश तथा संघीय सरकारको सहयोग र स्थानीय समुदायको सहभागिता जोड्न सके अहिले सीमित मानिसले मात्र चिनेको छेडेतोली पाटन भविष्यमा गौमुलको पर्यटन पहिचान बोकेको नयाँ गन्तव्य बन्न सक्ने देखिन्छ ।