बाजुरा ः बुढीनन्दा नगरपालिका अन्तर्गतका माध्यमिक विद्यालयहरुको शैक्षिक गुणस्तर यस वर्षको एसइई परीक्षाको नतिजामा उत्साहजनक देखिएको छ ।

शिक्षा, युवा तथा खेलकुद शाखाले सार्वजनिक गरेको विवरण अनुसार नगरपालिकाभित्रका पाँच विद्यालयमध्ये जनप्रकाश माध्यमिक विद्यालय कोल्टी उत्कृष्ट नतिजा सहित अग्रस्थानमा रहेको छ ।

सार्वजनिक नतिजा अनुसार जनप्रकाश मावि कोल्टीबाट परीक्षामा सहभागी १२४ जना विद्यार्थीमध्ये ११४ जना उत्तीर्ण भएका छन् भने १० जना अनुत्तीर्ण भएका छन् । उक्त विद्यालयको उत्तीर्ण प्रतिशत ९१.९४ रहेको छ ।

विद्यालयबाट ३.२ देखि ३.६ जीपीए ल्याउने ३१ जना तथा २.८ देखि ३.२ जीपीए ल्याउने ५८ जना विद्यार्थी रहेका छन् । त्यसैगरी, सत्य मावि पाण्डुसैनले ८९.८३ प्रतिशत नतिजा ल्याएको छ । उक्त विद्यालयबाट सहभागी ५९ जनामध्ये ५३ जना उत्तीर्ण भएका छन् ।

नन्देश्वरी मावि कालासिलले ८७.८८ प्रतिशत नतिजा हासिल गर्दा ३३ जना मध्ये २९ जना विद्यार्थी उत्तीर्ण भएका छन् । यस्तै, पादुका माविबाट सहभागी ४३ जनामध्ये ४१ जना उत्तीर्ण भई ९५.३५ प्रतिशत नतिजा प्राप्त भएको छ भने देवडाँडा मावि कुलले ५३ जनामध्ये ५० जना विद्यार्थी उत्तीर्ण गराउँदै ९४.३४ प्रतिशत नतिजा हासिल गरेको छ ।

नगरपालिकाभरबाट कुल ३११ जना विद्यार्थी एसइई परीक्षामा सहभागी भएकामध्ये २८६ जना उत्तीर्ण भएका छन् भने २५ जना अनुत्तीर्ण भएका छन् । समग्र उत्तीर्ण प्रतिशत ९१.८७ रहेको शिक्षा, युवा तथा खेलकुद शाखाले जनाएको छ ।

नगरपालिकाले यस वर्षको नतिजालाई शैक्षिक सुधारको सकारात्मक संकेतका रुपमा लिँदै आगामी दिनमा अझ गुणस्तरीय शिक्षा प्रदान गर्न विद्यालय, शिक्षक, अभिभावक तथा विद्यार्थीको सहकार्यलाई थप प्रभावकारी बनाइने भएको छ ।