बुधबार २४, भदौ २०८३ १२:४२
बुधबार २४, भदौ २०८३ १२:४२
गाैमुल खबर
बाजुरा ः गौमुल गाउँपालिकाले यस वर्षको माध्यमिक शिक्षा परीक्षा (एसइई) मा विगतका वर्षहरुको तुलनामा सुधार हासिल गरेको छ । गाउँपालिकाभित्रका सामुदायिक विद्यालयहरुको नतिजा हेर्दा विद्यार्थीको उत्तीर्ण प्रतिशत बढेको देखिएको हो ।
गाउँपालिकाले सार्वजनिक गरेको एसइई नतिजा २०८२ अनुसार विभिन्न विद्यालयका विद्यार्थीहरुले सन्तोषजनक सफलता हासिल गरेका छन् । समग्रमा गाउँपालिकाको औसत उत्तीर्ण प्रतिशत करिब ६९ प्रतिशत पुगेको छ, जसलाई शिक्षा क्षेत्रमा सकारात्मक उपलब्धिका रुपमा हेरिएको छ ।
यस वर्ष कीर्तिचौर माध्यमिक विद्यालयले १०० प्रतिशत नतिजा ल्याएर उत्कृष्ट सफलता हासिल गरेको छ भने अन्य विद्यालयहरूको नतिजामा पनि सुधार देखिएको छ । गाउँपालिकाभित्रका अधिकांश विद्यालयहरुले अघिल्लो वर्षको तुलनामा राम्रो नतिजा ल्याएपछि शिक्षक, अभिभावक तथा जनप्रतिनिधिहरु केही उत्साहित बनेका छन् ।
शिक्षकहरुको मेहनत, अभिभावकको चासो र गाउँपालिकाको शैक्षिक सुधार अभियानका कारण नतिजामा सकारात्मक परिवर्तन आएको स्थानीय सरोकारवालाहरुको भनाई रहेको छ ।
विशेषगरी नियमित पठनपाठन, अतिरिक्त कक्षा सञ्चालन तथा विद्यार्थीमाथिको निगरानीले नतिजा सुधारमा टेवा पुगेको बताइएको छ । गाउँपालिकाले आगामी वर्षहरुमा अझ प्रभावकारी शैक्षिक कार्यक्रम सञ्चालन गरी एसइई नतिजालाई थप गुणस्तरीय बनाउने लक्ष्य लिएको जनाएको छ ।
प्रतिक्रिया