बाजुरा ः बुढीगंगा नगरपालिकाका स्वास्थ्य संस्था एक जना कर्मचारीको भरमा मात्र सञ्चालन हुँदै आएका छन् । पहिला दशवटै वडामा रहेका दश स्वास्थ्य संस्थामा एक जना अहेव र दुई जना अनमी र एक कार्यलय सहयोगीले गरी चार जना कर्मचारी रहेका थिए । असोज ३० गते बसेको कार्यपालिकाको ४९ औँ बैठकले ४६ जना करार अस्थायी तथा दैनिक ज्यालादारीमा राखेर काम गर्दै आएका झण्डै ४६ जना स्वास्थ्यकर्मी हटाएसँगै ती स्वास्थ्य संस्था एक जनाको भरमा सञ्चालन हुँदै आएको हो ।

सामान्य स्वास्थ्य सेवा लिनका लागि पहिला अधिकांश स्थानीय दुई चार घण्टा पैदल हिँडेर सेवा लिन बाध्य थिए । पछिल्लो समय त्यहीँ अवस्थालाई मध्यनजगर गर्दै यहाँका स्थानीय सरकारले गाउँ बस्तीमै आधारभूत स्वास्थ्य संस्था सञ्चालनमा ल्याएका थिए । त्यति बेला यहाँका स्थानीयलाई स्वास्थ्य सेवा लिन पनि निकै सहज भएको थियो । त्यति मात्र होइन कति बेला त स्वास्थयकर्मी सेवाग्राहीको घरमै पुगेर सेवा दिने गरेका थिए ।

अहिले एक स्वास्थ्य संस्थामा एक जना मात्र कर्मचारी भएकाले सेवाग्राहीहरुको घरमा पुगेर सेवा दिन त के यहाँ आउने गरेका सेवाग्राहीलाई समेत समस्या हुने गरेको बुढीगंगा नगरपालिका-७ झाली बर्थिङ्ग सेन्टरमा कार्यरत बिनिता बिष्टले बताएकी छन् । उनले भनिन्, “कतिपय महिलाहरुलाई घरमै सुत्केरी व्यथा लागेर यहाँ आउँन सक्दैनन् । त्यति बेला उनीहरुलाई सेवा दिनका लागि हामीले उनीहरुको घरमै पुग्नु पर्नेहुन्छ ।”

अहिले स्वास्थ्य संस्थामा एक जना मात्र कर्मचारी छु । कसैले घरमा बोलाएपछि अहिले त्यहाँ जान सकिने अवस्था छैन् । यही समस्याका कारण गत कात्तिक १४ गते बुढीगंगा नगरपालिका –७ सिमलकोट की अन्दाजी २५ वर्षीया सिर्जना केसीलाई बीच सडकमा नै सुत्केरी सेवा दिनुपर्ने अवस्था सिर्जना भएको बिष्टले बताईन् ।

प्रदेश सरकारले अस्थायी कर्मचारी हटाउने निर्देशन दिएसँगै करारका सबै कर्मचारी हटाएपछि अहिले नागरिकको स्वास्थ्यलाई मध्येनजर गर्दै नगरपालिका भित्रमा रहेका स्वास्थ्य संस्थालाई बन्द नहुने गरी पछिल्लो समय पालिकाले एक एक जना कर्मचारी रहने गरी सबै स्वास्थ्य संस्थामा मिलान गरेको स्वास्थ्य शाखाले जनाएको छ । कर्मचारी हटाएपछि स्वास्थ्य संस्था समेत बन्द हुने अवस्था थियो ।

तर अहिले ती स्वास्थ्य संस्था बन्द नहुने गरी तत्काल केही कर्मचारी मिलान गरेको नगरपालिकाका स्वास्थ्य शाखा संयोजक पुष्पराज गिरीले बताएका छन् । उनले भने, “पहिला एक स्वास्थ्य संस्थामा एक जना अहेब दुई जना अनमी एक जना कार्यालय सहयोगी कार्यरत हुनुहुन्थ्यो । अहिले करारका सबै हटाएपछि भने एक जना अनमी र कतै अहेब मात्र राखेर स्वास्थ्य संस्था सुचारु गरेका हुन्।”

स्थानीय तहले प्रदान गर्नुपर्ने आधारभूत स्वास्थ्य सेवा प्रभाव नपर्ने गरी तत्कालका लागि धुरालसैन आधारभूत स्वास्थ्य केन्द्रमा सिनियर अनमी सीता शाह र बिन्दु विष्ट , ताँप्रा आधारभुत स्वास्थ्य केन्द्रमा सिनियर अनमी देवकी गौतम, डेल्टामा सिनियर अहेब दिपक शाह, बाम्का आधारभुत स्वास्थ्य केन्द्रमा सिनियर अहेब निला शाह, सिमलकोट आधारभूत स्वास्थ्य केन्द्रमा विनिता बिष्ट, मोटाबाडा आधारभूत स्वास्थ्य केन्द्रमा सिनियर अहेब कुलबहादुर रावल, सिँगाडामा मीना कुमारी जैशी र सेलापाखा शहरी स्वास्थ्य ईकाईमा अनमी देबिका शाह सिंह खटाईको छ । समाचार दिनेश खबरबाट साभार गरिएको हो ।