बाजुरा ः गौमुल गाउँपालिका-१ मा रहेको अम्लिस माध्यमिक विद्यालयको व्यवस्थापन समितिले विद्यालयको शैक्षिक गुणस्तर अपेक्षित रूपमा सुधार नहुँदाको कारण पहिचान गर्न पहल थालेको छ ।

विद्यालयमा केही हदसम्म सुधार भए पनि अपेक्षित परिणाम प्राप्त नहुँदा त्रिपक्षीय संवाद मार्फत समस्या पहिचान र समाधानका उपाय तय गर्न थालिएको विद्यालय व्यवस्थापन समितिका अध्यक्ष तथा वडा अध्यक्ष देवेन्द्र रोकायाले बताएका छन् ।

शुक्रबार विद्यालय व्यवस्थापन समिति, शिक्षक-अभिभावक संघ, अभिभावक, शिक्षक तथा कक्षा ८ देखि १० सम्मका विद्यार्थीबीच त्रिपक्षीय संवाद कार्यक्रम आयोजित गरिएको थियो ।

शिक्षक-अभिभावक संघका अध्यक्ष हिक्मत रोकायाका अनुसार संवादमा विद्यार्थीहरूको अध्ययनमा सुधार ल्याउन अभिभावकहरूले घरमा नियमित निगरानी बढाउने र विद्यालय प्रशासनले कक्षा १० का विद्यार्थीलाई विद्यालयको आवास निर्माण सम्पन्न भएपछि आवासीय निगरानीमा राख्ने निर्णय गरिएको छ ।

कार्यक्रमको अवसरमा एच.आर.सी. बाजुरालाई शैक्षिक सामग्री समेत वितरण गरिएको थियो । संवाद कार्यक्रममा विद्यालय व्यवस्थापन समितिका अध्यक्ष देवेन्द्र रोकाया, कार्यपालिका सदस्य मैना चदाँरा, अभिभावक, शिक्षक र विद्यार्थीहरूको उल्लेखनीय उपस्थिति रहेको थियो ।