बाजुरा ः सुदूरपश्चिमका दुर्गम गाउँहरुमा पनि पछिल्लो समय खेल क्षेत्रको उल्लेख्य विकास भएको देखिन्छ । खेल प्रतिको युवा आकर्षण र राष्ट्रिय तथा अन्तर्राष्ट्रिय स्तरका खेलकुदमा हुने सफलताले पनि प्रमाणित गरेको छ । श्रोतसाधन र सीप तथा प्रशिक्षण अभावका बीच पनि युवाहरुमा खेलरुची व्यापक देखिन्छ । 

भलिबल होस्, कि फुटबल, क्रिकेट होस् कि कराते गाउँ गाउँमा आयोजना हुने गरेका छन् । राष्ट्रपति रनिङ शिल्ड बाहेक कुनै खेल आयोजना नहुने बाजुरामा केही वर्षयता गोल्डकप देखि क्रिकेटका क्षेत्रीय खेलहरु समेत आयोजना हुने गरेका छन् । यतिसम्मकी बाजुराकै खेलाडीहरु देश बाहिरका खेलमा भाग लिदै छन् । 

भारतको झारखण्डमा हुने दक्षिण एसीयाली खुला कराते प्रतियोगितामा बाजुराबाट ८ जनाले भाग लिने भएका छन् । खेल बैशाख ५ देखि ७ गतेसम्म झारखण्ड राज्यको गिरप्थ टाउन हलमा आयोजना हुने छ । बाजुराबाट दक्षिण एसीयाली खेलमा भाग लिएको यो पहिलो इतिहास हो । क्षेत्रीय छनोटबाट कोही खेलाडीले भाग लिन पाएपनि जिल्ला तहबाट छनोट भएर जान लागेको पहिलो पटक हो, अन्तर्राष्ट्रिय खेल प्रशिक्षक नरेन्द्र ओलीले बताए । 

ओलीले तीन दशक भारतको मुम्बईमा कराते खेल विकासमै बिताएका छन् । हाल खप्तड छेडेदह गाउँपालिकामा खेल प्रशिक्षकको रुपमा कार्यरत ओली आफै त्यो खेलको रेफ्री समेत हुन् । उनकै नेतृत्वमा बाजुराबाट ८ जना खेलाडी सहीतको टोली जान लागेको हो । टोलीलाई गाउँपालिका अध्यक्ष दिलबहादुर रावत र उपाध्यक्ष बिशु देवी नाथले औपचारिक विदाइ गरेका छन् । 

दक्षिण एसीयाली खेलमा सुशील बहादुर कठायत, शुभम रावत, अमित रावत, अमृत बुढा, सुरेन्द्रा कुमारी रावत, रमा रावत, सरिता सुनार र गिता कठायतले भाग लिनेछन् । यी बाहेक कमल रावत, कमल खड्का, केशबहादुर रोकाया, प्रदीप सुनार, रोहित विक, लक्ष्मी कुमारी कठायत, कोपिला कुमारी शाही, दिपिका चदारा र अनुराधा सुनारपनि खेलका लागि छनोट भएका छन् । 

उनीहरुले यही चैत्र २६ देखि २९ गते सम्म कैलाली जिल्लाको धनगढी रंगशालामा हुने खेलमा भाग लिनेछन् । सुदूरपश्मिच प्रदेश स्तरीय खेल नेपाल कराते महासंघले आयोजना गरेको हो । पालिकाले विदाइ गर्नु पूर्व क्षेत्रीय खेल र अन्तर्राष्ट्रिय खेलमा सहभागि हुने खेलाडीलाई एक महिना बन्द प्रशिक्षणमा राखिएको थियो । 

खेलाडी सहीत १ टिम व्यवस्थापक रमेश  बहादुर रावत र प्रशिक्षक नरेन्द्र ओली टिममा सहभागि हुने गरि विदाई गरिएको गाउँपालिका अध्यक्ष दिबहादुर रावतले बताएका छन् । गाउँ, समाज र देश चिनाउने विधा नै खेलकुद भएकोले पालिकाको लगानी र सरोकार खेलाडी उत्पादनमा केन्द्रीत गरिएको अध्यक्ष रावतको भनाई छ ।

खेलकुदबाट मान पनि, सम्मान पनि र राम्रो गर्न सके व्यक्तिगत आम्दानी पनि गर्न सकिने विधा नै खेलकुद भएकोले प्रशिक्षक राखेर नै नियमित अभ्यास गर्ने र लगानी पनि बढाउने गरि पालिकाले नीति लिएको उपाध्यक्ष बिशुदेवी नाथले बताईन् । विदाइमा सहभागि निमित्त प्रमुख प्रशासकीय अधिकृत नन्दबहादुर रावतले पहिलो पटक त्यो पनि देश बाहिरको एसीयाली खेल खेल्न खेलाडी पठाउन पाउनु नै पालिकाका लागि गर्वको विषय बनेको बताएका छन् ।

खेलाडीका लागि मष्टेश्वरी मावि डोगडीले ३० हजार र न्यू बढालेक निर्माण सेवाका व्यवसायी अंगबहादुर ओलीले पोशाक सहीत ५२ हजार आर्थिक सहयोग गरेका छन् । बाँकी खेलाडीका लागि आवश्यक लगानी पालिकाले नै बेहोर्ने छ । 

खेल प्रशिक्षकको रुपमा रहेका नरेन्द्र ओली नेपाल कराते महासंघका राष्ट्रिय निर्णायक तथा प्रशिक्षक एवं राष्ट्रिय गोजुरियो करातेका केन्द्रिय कोषाध्यक्ष हुन् । भने उनी मार्सल आर्टका  अन्तर्राष्ट्रिय प्रशिक्षक पनि हुन् । पालिकाले जिल्लामै पहिलो एसीयाली खेलमा खेलाडी पठाउने अवसर पाएको प्रति खुसी व्यक्त गरेको छ ।