बाजुरा ःठेक्का सम्झौता गरेर आयोजना अलपत्र पारेका थुप्रै समाचार हामी सुन्छौं, पढ्छौं । अझ कतिपय आयोजनाको समयावधि सकिँदा समेत सुरुवात नै नभएका उदाहरण बग्रेल्ती भेटिन्छन् ।

तर, निर्माण कम्पनीले समयमै काम सुरु गरेर समयावधि भन्दा अगावै काम सम्पन्न हुनेगरी गरेको कामको रकम सरकारले भुक्तानी दिन नसक्दा मानाकोट जोड्ने सिमधारा खोला पक्की पुल निर्माणको काम अलपत्र परेको छ ।

गौमुल गाउँपालिकाको केन्द्र नजिकपर्ने सिमधारा खोला पक्की पुल निर्माण कार्य अलपत्र परेपछि साविकको मानाकोट गाविस जोड्ने पुल निर्माण कार्य अधुरै छोडेर निर्माण कम्पनी हालसम्म फिर्ता भएको छैन् ।

नन्देगडा एस.एम.पी.जे.भी. धनगढी, कैलालीसंग २०७९ पुस २९ गते पूर्वाधार विकास कार्यालय साँफेबगर, अछामले सम्झौता गरेको थियो ।

सम्झौतापछि २०८० पुस १६ गतेदेखि निर्माण कार्य सुरु गरेको उक्त निर्माण कम्पनीले समयै सरकारले भुक्तानी दिन नसक्दा हालसम्म पुल निर्माण अस्तव्यस्त बनेको छ ।

सम्झौता रकम ७ करोड २८ लाख ६६ हजार ४ सय ४७ रुपियाँ ८५ पैसामा २०८१ असार ३० गतेसम्म निर्माण कार्य गरिसक्ने गरी सम्झौता गरिएको थियो ।

पूर्वाधार विकास कार्यालय साँफेबगरका प्रमुख जंगबहादुर थापाका अनुसार १ करोड १९ लाख ३६ हजार ८ सय ८४ पैसा भुक्तानी लिएको भएपनि थप दिन नसक्दा समस्या उत्पन्न भएको बताएका छन् ।

संघीय सरकारको शसर्त अनुदानमा सिमधारा खोला पक्की पुल निर्माण गर्न लागिएको भएपनि भुक्तानीकै कारण रोकिएको स्वीकार थापाले गरेका छन् ।

ठेकेदार कम्पनीले तीव्र रुपमा काम गरेर सकाउने चाँसो राखेको भएपनि २ करोड ५ लाख बढी रकम भुक्तानी दिन नसक्दा समस्या उत्पन्न भएको उनको भनाई रहेको छ ।

उता नन्देगडा एस.एम.पी.जे.भी. धनगढी, कैलालीका निर्माण कार्य गराउने व्यक्ति राज कुमार शिवाकोटीले सरकारले भुक्तानी नदिएका कारण अलपत्र परेको स्वीकार गरेका छन् ।

भुक्तानीका लागि पटक–पटक आग्रह गरेको भएपनि सरकारले भुक्तानी हालसम्म नगरेको उनले बताएका छन् । पक्की पुल निर्माण गरेर काम सम्झौता अवधि अगावै सक्ने लक्ष्य आफ्नो रहेको भएपनि भुक्तानीकै कारण समस्या सिर्जना भएको गौमुल खबर डटकमसंग बताएका छन् ।

गौमुल गाउँपालिकाका अध्यक्ष हरिबहादुर रोकायाले स्थानीय पूर्वाधार विकास विभागमा गएर भुक्तानी दिन अनुरोध गरेको भएपनि हालसम्म नगरेको बताएका छन् ।

सिमधारा खोलामा पक्की पुल निर्माण हुने भएपछि खुसी भएका स्थानीय दुईवटा पिल्लर ठड्याएर काम अधुरो छोडेपछि वर्षादमा गाडी चढ्ने सपना सपनामै सीमित भएको छ ।