बाजुरा : बुबा सुस्त मनस्थितिका छन् । आमालाई सबै कुरा थाहा छैन् । आफन्त कोही सहारा छैन् । अस्पतालले उपचार सम्भव नहुने भनेपछि रिफर गरेको छ । अस्पतालको शैयामा दुई दिनदेखि छट्पटी रहेकी छन्, गौमुल गाउँपालिका–५ कोटकी १६ वर्षीया विष्णुमाया रोकाया ।

शनिबार बिहान भीरबाड लडेर गम्भीर घाइते भएकी छन् । गाउँमा रहेको कैलाश आधारभूत विद्यालय नजिकैको भीरबाट शनिबार बिहान ८ बजेतिर उनी लडेकी हुन् । करिब १ सय ५० मिटर बढी तल लडेपछि टाउँकोमा गम्भीर चोट लागेको छ ।

गाउँका केही महिलाहरुको सहयोगमा उनलाई गाउँपालिकाको केन्द्रमा रहेको घट्मुना आधारभूत अस्पतालमा आफन्तले ल्याएका थिए ।

केही उपचार गरिएको भएपनि टाउँकोमा गम्भीर चोट लागेको, कान, नाकबाट रगत बगिरहेको र निरन्तर वान्ता भएका कारण थप सीटी स्क्यानका लागि धनगढी रिफर गरिएको डाक्टर कुश नेपाली बताएका छन् ।

डाक्टर नेपालीले आफुहरुको बलबुता अनुसार उपचारका सबै विधि प्रयोग गरेको र बाँच्ने आधार बिरामीको प्रशस्त भएपनि आफन्तको अवस्था दयनीय भएका कारण समस्या भएको बताएका छन् ।

अस्पतालको शैयामा दुईदिनदेखि बालिका मृत्युसंग लडिरहेकी छन् । आमा हेरचाह गर्न आएको भएपनि आर्थिक अवस्था कमजोर भएका कारण लिने अवस्था रहेको छैन् ।

मानाकोट मावि कक्षा–७ मा अध्ययन रहेकी बालिका दाउँरा लिन जंगल जाने क्रममा चिप्लिएर भीरबाट खसेको हुन् । सुस्त मनस्थिति भएका बुबा समेत कामको सिलसिलामा भारतमा रहेका छन् ।

आमाले ऋण जोहो गरेर पत्याउने अवस्था छैन् । आफन्त पनि बुबा सुस्त मनस्थितिको भएकै कारण ऋण दिने अवस्थामा छैनन् ।

गरिबको कोही सहारा हुदैन भन्ने प्रमाणको पुष्टि विष्णुमायाले गरेकी छन् । कलकलाउँदो उमेरमै उपचार नपाएर मर्नुपर्ने बाध्यता उनलाई परेको छ ।