बाजुरा : बाजुराको गौमुल गाउँपालिका–३ स्थित बेहरीको सिममाटामा चट्याङ लागेर ३३ भेडा बाख्रा मरेका छन् । असोज १८ गते बेलुका साढे ५ बजेतिर परेको चट्याङले भेडाबाख्रा मरेको गौमुल गाउँपालिकाका उपाध्यक्ष सीता थापाले बताएकी छन् ।

गौमुल गाउँपालिका–३ जडेचौकाका स्थानीय चक्र बहादुर धामीका २० वटा भेडाबाख्रा र १ कुकुर, गौमुल गाउँपालिका–३ बेहरीका गोरख बहादुर रोकायाका १३ वटा भेडाबाख्रा मरेको प्रत्यक्ष स्थलबाट वडा सदस्य भान बहादुर धामीले जानकारी दिएका छन् ।

तीन जना भेडाबाख्रा गोठाला सामान्य घाइते भएका छन् । घाइते हुनेमा १२ वर्षीया मनिष रोकाया, १६ वर्षीया रेशम धामी र ११ वर्षीया विक्रम धामी रहेका छन् । गौमुलमा पाटन र खर्कमा व्यवस्थित भेडीगोठ नहुँदा हरेक वर्ष चट्याङबाट भेडाबाख्रामा ठूलो क्षति गर्ने गरेको छ ।

भेडाबाख्रा चट्याङबाट मरेपछि आफुहरुलाई घर खर्च गर्न समस्या भएको पीडितहरुले बताएका छन् । पीडित चक्र बहादुर धामीले भने, ‘यहीँ पेशाबाट आम्दानीको माध्यम बनेको थियो । घर खर्चदेखि बालबच्चाको पढाई खर्च सहजरुपले धानेको थियो ।’

स्थानीय सरकारले राहतको लागि माथिल्लो सरकारी निकायमा पहल गरिदिन अनुरोध गरेको भेडापालक गोरख बहादुर रोकायाले बताए । उनले भने, ‘चट्याङबाट भेडा मरेको जानकारी गराएका छौं ।

राहत र क्षतिपूर्तिका लागि सम्बन्धित निकायलाई सहयोगको अपिल समेत गरेका छौं ।’ यता गौमुल गाउँपालिकाका उपाध्यक्ष सीता थापाले घटनाप्रति दुःख व्यक्त गर्दै स्थानीय सरकारबाट हुने सहयोग गरिने बताएकी छन् ।