बाजुरा : भोलीबाट हुने जिल्ला स्तरीय राष्ट्रपति रनिङ शिल्ड प्रतियोगितामा सहभागि हुन गौमुल गाउँपालिकाबाट खेलाडीको टिम कोल्टीतिर हिडेको छ । बुढीनन्दा नगरपालिकाको जनप्रकाश माविको खेलमैदानमा हुने यस वर्षको शिल्डमा भाग लिन प्रशिक्षक सहीत खेलाडीको टिम आज विहान कोल्टी तर्फ हिडेको हो । 

जिल्ला खेलकुद समितिको निर्णय अनुसार माघ १५ गतेदेखि १८ गतेसम्म चार दिन बुढीनन्दा नगरपालिका स्थित कोल्टीमा रनिङ शिल्ड प्रतियोगिता सञ्चालन हुने भएको छ । उक्त प्रतियोगितामा सहभागि हुन गौमुलबाट व्यवस्थापक सहीत १८ जना प्रशिक्षक र ८१ जना खेलाडी गाउँपालिकाबाट हिडेको खेल प्रशिक्षक गोविन्द रोकायाले बताएका छन् ।

खेलाडीलाई जितको अग्रम शुभकामना दिदैँ गाउँपालिका निमित्त प्रमुख प्रशाकीय अधिकृत धर्मबहादुर खडायतले अविर लगाएर विदाई गरेको छ । पालिका स्तरीय शिल्डबाट छनोट भएका खेलाडीहरु सहभागि गराईएको छ । 

१८ वर्षमुनिका कक्षा–१२ सम्म नियमित अध्ययन गरिरहेका छात्रछात्रा खेलाडी विभिन्न विधामा भाग लिने गरी तयारीका साथ गएका छन् । झण्डै एकहप्ता गाउँपालिकाको केन्द्र घट्मुनामा पालिका स्तरीय शिल्डमा छनोट भएको खेलाडीहरुलाई थप क्षमता विकासका लागि अभ्यास गराएको थियो । 

गाउँपालिकाबाट छात्रछात्रा तर्फ भलिबल, दौड, एथ्लेष्टिक, रिले, भाला, ज्याप्लिङगथ्रो लगायत १६ विधामा भाग लिने प्रशिक्षक दलबहादुर रोकायाले बताएका छन् । खेलको भोली भव्य समारोहबीच प्रतिनिधी सभा सदस्य बद्रीप्रसाद पाण्डेले उद्घाटन गर्ने कार्यक्रम रहेको छ । 

नौ वटै स्थानीय तहका करिब हजारको संख्यामा खेलाडी सहभागि हुने अनुमान गरिएको शिल्ड तीनदिन सम्म चल्नेछ । पालिका स्तरीय शिल्डबाट छनोट भएका खेलाडी, अन्य खेलप्रेमी र दर्शकहरु कोल्टी जानेक्रम बढीसकेको छ । तल्लो क्षेत्रका स्थानीय तहका खेलाडी हिजोदेखि नै कोल्टी जान थालेका थिए ।

आज नाै‌ वटै स्थानीय तहका खेलाडी कोल्टी पुगिसक्ने अनुमान गरिएको छ । खेलमा नौ वटा पालिकाबीच प्रतिस्पर्धा गराइने छ । पालिका स्तरीय छनोटबाट जितेका खेलाडीले जिल्लाको प्रतिनिधीत्व गर्दै प्रदेश स्तरीय शिल्डमा भाग लिन पाउने छन् ।