बाजुरा ःबाजुराको दुर्गम गाउँमा १८ वर्षदेखि बाँया खुट्टाको नशा चुँडिएर असह्य पीडा झेलिरहेका खप्तड छेडेदह गाउँपालिका-६ मैतोलाका ३३ वर्षीय उमेश नाथका लागि हिँडडुल गर्नु समेत कठिन बनेको थियो ।

उपचारको खोजीमा उनले विभिन्न अस्पताल र स्वास्थ्य शिविर धाए, तर पीडा कम हुन सकेन । वर्षौँसम्म उपचार गराउँदा पनि निको नभएको समस्या अन्ततः जिल्ला अस्पताल बाजुरामै उनकाे सफल अप्रेसनपछि समाधान भएको छ ।

जिल्ला अस्पताल बाजुरामा कार्यरत हाडजोर्नी तथा नशा रोग विशेषज्ञ डाक्टर शिरीष श्रेष्ठले उमेश नाथको समस्याको गम्भीरता बुझेर आवश्यक परीक्षणपछि खुट्टाको सफल अप्रेसन गरेका थिए ।

अप्रेसनपछि अहिले नाथ सामान्य रुपमा हिँडडुल गर्न सक्ने अवस्थामा पुगेका छन् । लामो समयदेखि पीडामा रहेका उनी अहिले नयाँ जीवन पाएजस्तै अनुभूति गरिरहेको बताउँछन् ।

“धेरै ठाउँ उपचार गराएँ, तर निको भएन । डाक्टर श्रेष्ठले अप्रेसन गरेपछि अहिले निकै सहज भएको छ,” नाथले खुसी व्यक्त गरे । दुर्गम पहाडी जिल्ला बाजुरामा विशेषज्ञ स्वास्थ्य सेवा पाउनु अझै पनि चुनौतीपूर्ण मानिन्छ ।

सडक पहुँच, आधुनिक उपकरण र विशेषज्ञ जनशक्तिको अभावका बीच जिल्ला अस्पताल धेरै नागरिकका लागि अन्तिम भरोसाको केन्द्र बनेको छ ।

यस्तै परिस्थितिमा डाक्टर श्रेष्ठले बिरामीको उपचारमा देखाएको समर्पण र व्यवहारले स्थानीयको विश्वास जित्दै गएको छ । अस्पतालमा दैनिक बिरामीको चाप अत्यधिक हुन्छ ।

पीडाले कराइरहेका बिरामी र उपचारको प्रतीक्षामा रहेका आफन्तबीच पनि डाक्टर श्रेष्ठको शान्त व्यवहार, मुस्कान र बिरामी प्रतिको संवेदनशीलताले फरक अनुभूति दिलाउने गरेको सेवाग्राहीहरू बताउँछन् ।

धेरै बिरामीको भनाइमा, “उहाँको मुस्कानले नै आधा रोग निको हुन्छ ।” व्यस्त समय तालिकाका बाबजुद पनि उनले प्रत्येक बिरामीको समस्या ध्यानपूर्वक सुन्ने, रोगको जडसम्म पुग्ने र उपचारसँगै बिरामीको मनोबल बढाउने प्रयास गर्ने गरेका छन् । यहीँ कारण बाजुराका धेरै बिरामी अहिले जिल्ला अस्पतालमै विशेषज्ञ सेवा पाउन थालेका छन् ।

स्वास्थ्य क्षेत्रमा प्राविधिक दक्षतासँगै मानवीय संवेदनाको पनि उत्तिकै आवश्यकता हुन्छ भन्ने उदाहरण डाक्टर श्रेष्ठले व्यवहारमै प्रस्तुत गरिरहेका छन् । विशेषगरी खुट्टाको जटिल समस्या र नशा सम्बन्धी रोगको सफल उपचारपछि धेरै बिरामीले राहत महसुस गरेका छन् ।

स्थानीयबासीहरुले राज्यलाई यस्ता समर्पित चिकित्सकलाई संरक्षण र प्रोत्साहन गर्न आग्रह गरेका छन् । “डाक्टर शिरीष श्रेष्ठ जस्ता चिकित्सक दुर्गम क्षेत्रमा टिक्न सके मात्र हामी गाउँका बिरामीले गुणस्तरीय सेवा पाउँछौँ,” स्थानीयको भनाइ छ ।

स्वास्थ्य सेवा औषधि र उपचारमा सीमित नभई बिरामीमा भरोसा जगाउने प्रक्रिया पनि हो । डाक्टर श्रेष्ठको समर्पण, सहानुभूति र सफल उपचारले बाजुराका धेरै बिरामीको जीवनमा नयाँ आशा थपेको छ ।