बाजुरा ःवैदेशिक रोजगारीलाई सुरक्षित, व्यवस्थित र उपलब्धिमूलक बनाउने उद्देश्यका साथ सञ्चालित सुरक्षित आप्रवासन परियोजना (सामी) कार्यक्रमको चौथो चरण गौमुल गाउँपालिकामा सञ्चालनमा आएको छ ।

संघीय सरकार र स्वीस सरकारबीच भएको द्विपक्षीय सम्झौता अन्तर्गत हेल्भेटास-स्वीस इन्टर अपरेसनको प्राविधिक सहयोगमा श्रम, रोजगार तथा सामाजिक सुरक्षा मन्त्रालयद्वारा सञ्चालन गरिएको ‘सुरक्षित आप्रवासन (सामी)’ परियोजना गाउँपालिकामा लागू गरिएको हो ।

पालिकाभित्र परियोजना सञ्चालन भएसँगै वैदेशिक रोजगारीमा गएका, फर्किएका तथा जाने तयारीमा रहेका व्यक्ति र उनीहरूका परिवारका सदस्यहरु प्रत्यक्ष रूपमा लाभान्वित हुने अपेक्षा गरिएको छ ।

परियोजनाले वैदेशिक रोजगारीमा जाने क्रममा, गन्तव्य मुलुकमा कार्यरत अवस्थामा तथा कामदारको मृत्यु पश्चात उद्धार, राहत, कानुनी सहायता र क्षतिपूर्ति प्रक्रियामा सहजीकरण गर्दै आएको छ ।

कार्यक्रममा गौमुल गाउँपालिकाका कार्यबाहक अध्यक्ष प्रकाश रोकायाले वैदेशिक रोजगारीमा गएकाहरुका लागि उद्धार, राहत र पीडितलाई न्याय दिलाउन राज्यस्तरबाट अझ प्रभावकारी रणनीति आवश्यक रहेको बताए ।उनले सुरक्षित रोजगारी सुनिश्चित गर्न सामी कार्यक्रम प्रभावकारी रहेको उल्लेख गरे ।

त्यसैगरी वडा अध्यक्ष अमर विकले स्थानीय सरकारले सामी कार्यक्रमलाई प्रभावकारी रुपमा कार्यान्वयन गर्दै वैदेशिक रोजगारीमा जान लागेका तथा गएकाहरूलाई लाभ पुग्ने विश्वास व्यक्त गरे । उनले स्थानीय स्रोत साधनको अधिकतम उपयोग गर्दै साना तथा घरेलु उद्यम, तरकारी खेती, पशुपालन र कृषि क्षेत्रमा सरकारले लगानी गरिरहेको जानकारी पनि दिए ।

कार्यक्रमको उद्देश्य र गतिविधिबारे सुरक्षित आप्रवासन परियोजना (सामी) की कार्यक्रम अधिकृत लक्ष्मी चौधरीले जानकारी गराएकी थिइन् । गाउँपालिकाको सभाहलमा सम्पन्न कार्यक्रमको सञ्चालन रोजगार संयोजक सिर्जना विष्टले गरेकी थिइन् ।

कार्यक्रममा वडा अध्यक्षहरु, कार्यपालिका सदस्यहरु, रेडियो गौमुल स्टेशनका प्रबन्धक रमित वि‍क, शाखा प्रमुखहरु लगायतको सहभागिता रहेको थियो ।