बाजुरा ः गौमुल गाउँपालिका-४ कालादहमा अवस्थित कीर्तिचौर माध्यमिक विद्यालयले पालिका स्तरीय छैटौँ राष्ट्रपति रनिङ शिल्ड खेलकुद प्रतियोगितामा उत्कर्षपूर्ण सफलता हासिल गरेका विद्यार्थी खेलाडीहरूलाई बधाई तथा सम्मान कार्यक्रम आयोजना गरेको छ ।
विद्यालय परिसरमै सम्पन्न उक्त कार्यक्रम एकै साथ विद्यालयका समग्र खेलकुद गतिविधि तथा उपलब्धिहरूको विस्तृत समीक्षा गर्न सञ्चालन गरिएको प्रधानाध्यापक भीम बहादुर बोहराले जानकारी दिएका छन् ।
विद्यालयले पछिल्ला वर्षहरूमा खेलकुदका साथै अन्य सह-पाठ्यक्रमगत क्षेत्रमा उल्लेखनीय प्रगति हासिल गरिरहेको भएपनि शैक्षिक गुणस्तरलाई अझ उचाइमा पुर्याउनु भने विद्यालयका लागि चुनौतीपूर्ण कार्य रहेको विद्यालय व्यवस्थापन समिति तथा वडा अध्यक्ष अमर विकले बताएका छन् ।
उनका अनुसार गाउँपालिका सरकार, विद्यालय प्रशासन, अभिभावक, शिक्षक तथा व्यवस्थापन समितिका सदस्यहरूको निरन्तर प्रयासका कारण विद्यालय क्रमशः सुधारको दिशामा अघि बढिरहेको छ ।
यस वर्षको गौमुल गाउँपालिका स्तरीय राष्ट्रपति रनिङ शिल्ड प्रतियोगितामा कीर्तिचौर माध्यमिक विद्यालयले १६ स्वर्ण, ८ रजत र १ कास्य सहित कुल २५ पदक जित्दै शानदार उपाधि हात पार्न सफल भएको छ ।
विद्यालयका खेलाडीहरूले प्रदर्शन गरेको कौशल, मेहनत र प्रतिबद्धताप्रति कार्यक्रमका सहभागी अतिथिहरूले बधाई ज्ञापन गर्दै उज्ज्वल भविष्यको शुभकामना व्यक्त गरेका छन् ।
कार्यक्रम विद्यालय व्यवस्थापन समितिका अध्यक्ष तथा वडा अध्यक्ष अमर विकको अध्यक्षतामा सम्पन्न भएको थियो । गौमुल गाउँपालिका–५ का वडा अध्यक्ष कलकबहादुर सिंह प्रमुख अतिथि तथा ३ नं. वडा अध्यक्ष गोरख बोहरा, ६ नं. वडा अध्यक्ष प्रकाश रोकाया र पूर्व प्रधानाध्यापक खडक शाह विशिष्ट अतिथि रहेका थिए ।
साथै नेपाल पत्रकार महासंघ बाजुरा शाखाका उपाध्यक्ष रमित विक, छिमेकी विद्यालयका प्रधानाध्यापक, अभिभावक, समुदाय प्रतिनिधि, शिक्षक तथा विद्यार्थीहरूको उत्साहपूर्ण उपस्थिति रहेको थियो ।
कार्यक्रमको सहजीकरण शिक्षक घमण्ड सिंहले गरेका थिए भने सञ्चालन शिक्षक गोपाल बमले गरेका थिए । विद्यालयको गौरव बढाउने खेलाडी तथा प्रशिक्षकहरूलाई सम्मान र शुभकामना सहित सम्मानित गर्दै कार्यक्रम सफलतापूर्वक सम्पन्न भएको विद्यालयले जनाएको छ ।
प्रतिक्रिया