बाजुरा ः बाजुराको गौमुल गाउँपालिका स्तरीय छैटौं राष्ट्रपति रनिङ शिल्ड खेलकुद प्रतियोगितामा कीर्तिचौर माध्यमिक विद्यालय च्याम्पियन बनेको छ ।

गाउँपालिका खेलकुद विकास समितिद्वारा आयोजित प्रतियोगितामा कीर्तिचौर माविले १६ स्वर्ण, ८ रजत र १ कास्य सहित कुल २५ पदक प्राप्त गर्दै प्रथम स्थान हासिल गरेको हो ।

प्रतियोगितामा वडा नं. २ को फूलपाटा मावि ५ स्वर्ण, १२ रजत र ४ कास्य सहित २१ पदक लिएर उपविजेता बन्दै दोस्रो भयो ।

त्यसैगरी वडा नं. ३ स्थित बालविकास माविले ४ स्वर्ण, १२ रजत र ४ कास्य सहित २० पदक प्राप्त गर्दै तेस्रो स्थान हात पारेको खेल प्रशिक्षक दलबहादुर रोकायाले जानकारी दिएका छन् ।

अम्लिस मावि ३ स्वर्ण, ५ रजत र ६ कास्य सहित १४ पदक सहित चौथो, जनज्योति मावि २ स्वर्ण, ४ रजत र ५ कास्य सहित ११ पदक लिएर पाँचौं स्थानमा रह्यो ।

स्वर्णविहीन मानाकोट माविले २ रजत र ११ कास्य सहित १२ पदक प्राप्त गर्दै छैटौँ स्थानमा पुगेको थियो । प्रतियोगितामा च्याम्पियन बनेको कीर्तिचौर माविलाई रनिङ शिल्ड, ट्रफी, मेडल तथा प्रमाणपत्र प्रदान गरिएको थियो ।

उपविजेता तथा तेस्रो हुने विद्यालयलाई पनि क्रमशः ट्रफी, मेडल र प्रमाणपत्रद्वारा सम्मानित गरिएको थियो । मार्शल आर्टतर्फ कराते र उसु, तथा इभेन्टतर्फ कबड्डी, सटफुट, भलिबल, ज्याभलिनथ्रो, हाईजम्प, दौड र रिलेदौडका उत्कृष्ट खेलाडीलाई ट्रफी तथा प्रमाणपत्र प्रदान गरिएको थियो ।

गाउँपालिका अध्यक्ष हरिबहादुर रोकाया, उपाध्यक्ष सीता थापा तथा वडा अध्यक्षहरूले खेलाडीलाई सम्मान गर्दै पुरस्कार वितरण गर्नुभएको थियो ।

साथै प्रतियोगिता सफल बनाउन महत्वपूर्ण भूमिका खेलेका प्रशिक्षकहरूलाई प्रशंसापत्रद्वारा सम्मानित गरिएको थियो ।

मंसिर १० गतेदेखि १२ गतेसम्म गाउँपालिकाको केन्द्र घट्मुनास्थित खेलमैदानमा सञ्चालन भएको प्रतियोगितामा गाउँभित्रका ६ वटा विद्यालयले सहभागिता जनाएका थिए ।

विगत तीनवर्षदेखि नियमित कीर्तिचौर माविले नै शिल्ड लिएको छ । प्रतियोगिताभर उत्कृष्ट नमूनाको रुपमा अनुशासित विद्यालयको रुपमा फूलपाटा माविलाई उच्च सम्मान गरिएको छ ।