बाजुरा ः गौमुल गाउँपालिकाका अध्यक्ष हरिबहादुर रोकायाले हरेक व्यक्तिलाई स्वस्थ, फुर्तिला र अनुशासित बनाउन सबैभन्दा प्रभावकारी माध्यम खेलकुद क्षेत्र भएको बताएका छन् ।

पालिका स्तरीय छैटौँ राष्ट्रपति रनिङ शिल्ड प्रतियोगिताको भव्य उद्घाटन समारोहलाई सम्बोधन गर्दै उनले खेलकुद मार्फत बालबालिकाको दिमाग मात्र होइन, चरित्र, आत्मविश्वास र नेतृत्व क्षमता समेत उजागर हुने बताएका छन् ।

अध्यक्ष रोकायाले प्रत्येक बालबालिकालाई फूर्तिलो, शारीरिक रूपमा सबल र मानसिक रूपमा दृढ बनाउने क्षेत्र खेलकुद नै भएकाले विद्यालय र अभिभावकले यसलाई प्राथमिकताको रुपमा लिनुपर्ने आवश्यकता औँल्याएका छन् । “स्वस्थ व्यक्ति मात्र सक्षम हुन्छ, सक्षम व्यक्ति मात्र समाज र राष्ट्रका लागि योगदान दिन सक्छ,” उनले भने ।

विद्यालयको पिटी तथा अन्य गतिविधिलाई मौलिक, अनुशासित र स्थानीय पहिचान झल्किने बनाउनुपर्नेमा जोड दिँदै उनले आयातित शैलीभन्दा आफ्नै मौलिकपनालाई आत्मसात् गर्नुपर्ने सुझाव दिएका छन् ।

विद्यालयहरूले अहिले गरिरहेका प्रयासप्रति आभार व्यक्त गर्दै उनले मौलिकताको संरक्षण र प्रवर्दनमा अझै ध्यान दिन सके अझ उत्कृष्ट नतिजा आउने विश्वास व्यक्त गरे ।

खेलकुद क्षेत्रमा गाउँपालिकाले प्रत्येक वर्ष गर्दै आएको व्यापक लगानीले अब शिक्षा र खेलमा गुणात्मक परिवर्तन देखिनुपर्ने उल्लेख गर्दै उनले विद्यालय व्यवस्थापन समिति, विद्यालय प्रशासन र समुदाय सबैलाई गम्भीर रूपमा अगाडि बढ्न अनुरोध गरे ।

“नवीनता, उत्साह र प्रतिस्पर्धात्मक भावना बिना प्रगति सम्भव छैन,” उनले जोड दिए । अध्यक्ष रोकायाले खेलाडीहरूलाई लक्ष्यप्रति अडिग रहन, अभ्यासलाई निरन्तरता दिन र ‘म सक्छु, म जित्छु’ भन्ने आत्मविश्वासका साथ मैदानमा उत्रिन प्रेरित गर्दै भने, “अल्छी भएर वा आधा मनले खेलेर उपलब्धि पाइँदैन ।

सपनालाई सफलता बनाउने शक्ति तपाईँहरूको मेहनत, अनुशासन र संकल्पमा निर्भर हुन्छ ।” उनले यस्तो प्रतियोगिताले विद्यार्थीको क्षमता उजागर गर्नुका साथै गाउँपालिकाको गौरव बढाउने विश्वास व्यक्त गर्दै सफल आयोजनाका लागि सबै पक्षलाई धन्यवाद समेत दिएकाे छ ।