काठमाडाैं ःबंगालको खाडीमा बनेको चक्रवात आँधी 'मोन्था' को प्रभाव नेपालमा पनि देखिन सक्ने मौसमविद्हरूले बताएका छन् । बीबीसी हिन्दीका अनुसार पछिल्लो ६ घण्टामा 'मोन्था' चक्रवाती आँधीमा बदलिएको छ । भारतीय मौसम विभागले मोन्थाले भीषण रूप लिन सक्ने भन्दै रेड अलर्ट जारी गरेको छ ।

भुवनेश्वर मौसम विज्ञान विभागका अनुसार यतिबेला मोन्था पश्चिम-मध्य बंगालको खाडीभन्दा केही माथि सक्रिय रहेको छ । विभागकी निर्देशक मनोरमा मोहन्तीले भनेकी छिन्, 'यो आँधी उत्तर पश्चिमतर्फ अगाडि बढ्नेछ ।

आन्ध्र प्रदेशको तटीय क्षेत्र मछलीपट्टनम र कंलिगपट्टनमको बीचतिर आज साँझ वा राति ९० देखि १०० किमि प्रतिघण्टाको गतिले ठोक्किने सम्भावना रहेको छ ।'

नेपालमा कस्तो प्रभाव पर्नेछ ?

जल तथा मौसम विज्ञान विभागकी प्रवक्ता मौसमविद् विभुति पोखरेलका अनुसार बंगालको खाडीमा विकसित चक्रवात 'मोन्था' मंगलबार राति भारतको आन्ध्र प्रदेशमा प्रवेश गर्ने क्रममा रहेको छ । त्यसपछि उक्त चक्रवात विस्तारै कमजोर हुँदै उत्तर-उत्तर पश्चिम दिशामा सर्ने पोखरेलले जानकारी दिएकी छिन् ।

न्यूनचापीय क्षेत्रका रूपमा नेपालको मध्य भू-भाग नजिक आई पूर्वतर्फ सर्दै बिहीबार दिउँसोदेखि शनिबार बिहानसम्म नेपालको बागमती, मधेश र कोशी प्रदेशको मौसम प्रभावित हुने विभागले जनाएको छ ।

त्यस्तै मौसमविद् सञ्जीव अधिकारीले उक्त प्रणालीको प्रभावले मधेश र कोशी प्रदेशका धेरै स्थानहरूमा तथा बागमती प्रदेशका केही स्थानहरूमा मध्यम वर्षाको सम्भावना रहेको बताए । त्यस्तै मधेश र कोशी प्रदेशका एक-दुई स्थानमा भारी वर्षाको पनि सम्भावना रहेको छ । मौसमविद् अधिकारीले भने, 'आज साँझतिर मोन्था चक्रवात जमिनमा ठोक्किएपछि विस्तारै कमजोर हुने अनुमान छ ।

नेपलामा यसको पेरिफेरल प्रभाव देखिने हो । मधेश र कोशीमा भारी वर्षा भए पनि गण्डकी र लुम्बिनी प्रदेशको पूर्वी भागमा भने कमजोर प्रभाव देखिन्छ ।' त्यस्तै विभागले कोशी र बागमती प्रदेशका उच्च पहाडी तथा हिमाली भू-भागका केही स्थानहरूमा तथा गण्डकी प्रदेशका उच्च पहाडी तथा हिमाली भू-भागका थोरै स्थानहरूमा मध्यम हिमपातको सम्भावना रहेको जनाएको छ । साथै कोशी र बागमती प्रदेशका उच्च पहाडी तथा हिमाली भू-भागका एक-दुई स्थानमा भारी हिमपातको सम्भावना समेत रहेको छ ।

केही नदीमा आकस्मिक बाढीको सम्भावना

विभागले बागमती, कमला, कोशी र कन्काई नदी र यी नदीका सहायक नदीहरुमा बहाव बढ्न सक्ने बताएको छ । साथै कोशी, बागमती र मधेश प्रदेशका महाभारत, चुरे भई बहने स-साना नदीनालाहरूमा आकस्मिक बहाव हुन सक्ने सम्भावना रहेको पनि मौसमविद्हरूले जनाएका छन् ।

बागमती प्रदेशका काठमाडौं उपत्यका, काभ्रे, सिन्धुपाल्चोक, दोलखा, मकवानपुर, चितवन र सिन्धुली, मधेश प्रदेशका बारा, पर्सा, सर्लाही, रौतहट, महोत्तरी, धनुषा, सप्तरी र कोशी प्रदेशका संखुवासभा, ताप्लेजुङ, पाँचथर, तेह्रथुम, भोजपुर, धनकुटा, इलाम, झापा, मोरङ, सुनसरी जिल्ला भई बहने स-साना नदीहरूमा आकस्मिक बहावको सम्भावना उच्च रहने देखिएको प्रवक्ता पोखरेलले जारी गरेको सूचनामा उल्लेख छ । विभागले वर्षा र हिमपातले नदीनालाहरूमा आकस्मिक बहाव र पहिरोको जोखिम रहेकाले आवश्यक सतर्कता अपनाउन अनुरोध गरेको छ ।