बाजुरा ःजिल्ला समन्वय समिति बाजुराका प्रमुख तुलसीराम रोकायाले खेललाई प्रतिस्पर्धा भन्दा पनि मित्रता र एकताको माध्यमका रूपमा बुझ्न खेलाडीहरूलाई आग्रह गरेका छन् ।

गौमुल गाउँपालिकाले पहिलो पटक आयोजना गरेको ‘प्रथम खुला गौमुल कप सेभन ए-साइड फुटबल प्रतियोगिता-२०८२’ को समापन कार्यक्रममा बोल्दै प्रमुख रोकायाले खेलले आपसी समझदारी, सहकार्य र भाइचाराको भावना विकास गर्न मद्दत पुर्याउने बताएका छन् ।

उनले भने, “खेलाडीबीचको मित्रता र पहिचान बढाउने पुलका रूपमा खेललाई हेर्नुपर्छ ।” समृद्ध गौमुल गाउँपालिकाको विकासका लागि खेलकुद पनि एक महत्वपूर्ण क्षेत्र भएको उल्लेख गर्दै उनले ‘गौमुल कप’ जस्तो प्रतियोगिताले स्थानीय विकास र समृद्धिमा अर्को इँटा थपेको बताए ।

कार्यक्रममा सहभागी सबै टोलीहरूले प्रतिशोध होइन, मैत्रीपूर्ण वातावरणमा खेल खेलेको भन्दै रोकायाले धन्यवाद ज्ञापन गरे । भौगोलिक चुनौतीका बाबजुद स्थानीय सरकारले खेलमैदानको व्यवस्थापनमा ध्यान दिनुपर्ने आवश्यकता औंल्याउँदै उनले गाउँपालिकाको केन्द्र घट्मुनास्थित मैदानलाई थप व्यवस्थित बनाउन सुझाव पनि दिएका छन् ।

उनका अनुसार यस्ता प्रतियोगिताले खेलाडीको प्रतिभा प्रस्फुटन गर्न, एकअर्काबाट सिक्ने अवसर प्रदान गर्न र स्थानीय सरकारलाई खेल पूर्वाधार निर्माणमा सक्रिय हुन प्रेरित गर्ने बताएका छन् ।