बाजुरा ः कर्णाली नदीमा फेला परेको बेवारिसे शवको पहिचान खुलेको छ । जिल्ला प्रहरी कार्यालय बाजुराका प्रहरी नायब उपरीक्षक इकवाल हवारीका अनुसार शव हुम्ला जिल्ला चंखेली गाउँपालिका-४ माथिल्लो पालीकी २० वर्षीया कर्मा बोहराको भएको पुष्टि भएको हो ।

बुधबार बिहान हिमाली गाउँपालिका-६ झुगाला नजिकै कर्णाली नदीको किनारमा दुई ढुंगाबीच सडेगलेको अवस्थामा ती युवतीको शव फेला परेको थियो । प्रहरीले शवलाई उद्धार गरी कोल्टी अस्पतालमा ल्याएको थियो ।

शव फेला परेको जानकारी पाएपछि मृतक कर्माका बुबा हर्क बोहरा सहितका आफन्त अस्पताल पुगेका थिए । उनीहरूले घाँटीमा लगाएको सिक्री र शारीरिक बनावटका आधारमा शवको पहिचान गरेका हुन् ।

परिवारका अनुसार कर्मा केही दिनअघि सोही गाउँका २३ वर्षीय हंस बुढाथोकीसँग हराएकी थिइन् । उनीहरूबीच लामो समयदेखि प्रेम सम्बन्ध रहेको र असोज ११ गते बिहान दुबैजनाले कर्णाली नदीमा हाम फालेको प्रारम्भिक बुझाइ रहेको प्रहरीले जनाएको छ ।

घटनापछि स्थानीयले खोजी गरेपनि उनीहरू फेला परेनन् । करिब १२ दिनपछि बाजुराको झुगालामा कर्माको शव फेला परेपछि परिवार र गाउँ शोकमा डुबेको छ । कर्मासँगै हाम फालेका युवक हंस बुढाथोकी भने हालसम्म बेपत्ता रहेका छन् ।

उनको खोजी कार्य जारी रहेको जिल्ला प्रहरी कार्यालय बाजुराले जनाएको छ । पोष्टमार्टमपछि मृतक युवतीको शव परिवारको जिम्मा लगाइएको छ । प्रहरीले घटनाको थप अनुसन्धान अघि बढाएको छ ।