बाजुरा ःगौमुल गाउँपालिका-१ नम्बर वडा कार्यालयको आयोजनामा सम्पन्न महिला तथा पुरुष खुला भलिबल प्रतियोगिताको पुरुषतर्फको उपाधि वडा नम्बर ६ सटेडामा रहेको संगम स्मृति युवा क्लबले जितेको छ ।

वडा कार्यालयले साविकको वडा स्तरीय भलिबल प्रतियोगीता आयोजना गरेको थियो । अम्लिस युवा क्लबलाई १३ अंकको अन्तरले पराजित गर्दै उपाधि आफ्नो पोल्टोमा पारेको हो ।

कडा प्रतिस्पर्धामा सम्पन्न फाइनल खेलमा अम्लिस युवा क्लब उपविजेता बन्न पुगेको हो । महिला समूहको प्रतियोगितामा स्वास्थ्य ईकाइ अम्लिसले उत्कृष्ट प्रदर्शन गर्दै उपाधि जित्न सफल भएको छ ।

उपविजेता अम्लिसमै रहेको मिलन टोल गाउँले प्राप्त गरेको छ । त्यस्तै फुटबल प्रतियोगितामा मिलन टोल अम्लिसले उपाधी जितेको छ । ३-२ गोल अन्तरले असल छिमेकी टोललाई पछार्दै उपाधी जितेका हो ।

कार्यक्रमका अवसरमा क्षेत्रीय प्रशिक्षक दलबहादुर रोकाया र राष्ट्रिय फुटबल खेलाडी तथा मछिन्द्र क्लबबाट खेल्ने खेलाडी सन्देश रोकायालाई हौसला स्वरुप तीन हजार नगद सहित वडा अध्यक्ष देवेन्द्र बहादुर रोकायाले सम्मान गरेका छन् ।

प्रतियोगितामा पुरुषतर्फ ९ टोली र महिलातर्फ ११ टोलीको सहभागिता रहेको थियो । सम्पूर्ण खेलहरू लिक नकआउट प्रणालीमा सञ्चालन गरिएका थियो ।

प्रतियोगितामा पुरुषतर्फ प्रथम पुरस्कार नगद रु २५ हजार, द्धितिय पुरस्कार रु १२ हजार रहेको थियो । महिलातर्फ प्रथम पुरस्कार रु ७ हजार, द्धितिय पुरस्कार रु ५ हजार र फुटबल प्रतियोगितातर्फ प्रथम २० हजार र द्धितिय १० हजार पुरस्कारको राशी रहेको थियो ।

प्रतियोगिताले स्थानीय स्तरमा खेलकुद विकासमा सकारात्मक योगदान पुर्याउने विश्वास आयोजकको रहेको वडा अध्यक्ष देवेन्द्रबहादुर रोकायाले बताएका छन् । 

खेल संयोजक जीवन कुमार रोकायाका अनुसार प्रतियोगिताको उद्देश्य स्थानीय खेल प्रतिभाहरूको पहिचान, प्रोत्साहन तथा आपसी सद्भाव सुदृढ गर्नु रहेको बताएका छन् ।