बाजुरा ः आर्थिक वर्ष २०८०-०८१ को स्थानीय तह संस्थागत क्षमता स्वमूल्याङ्कन (लिजा) को नतिजा सार्वजनिक भएको छ । शुक्रकार संघीय मामिला तथा सामान्य प्रशासन मन्त्रालयले अन्तिम नतिजा सार्वजनिक गरेको हो ।

लिजाको नतिजा अनुसार बाजुराका ९ स्थानीय तहमध्ये बुढीगंगा नगरपालिकाले सबैभन्दा बढी अंक ल्याउदैँ लगातार दोस्रो पटक उत्कृष्ट बनेको छ । बुढीगंगाले ८४ दशमलव २५ अंक ल्याउँदै सुदूरपश्चिम प्रदेशमा दोस्रो स्थान ल्याउन सफल भएको छ ।

गत वर्ष सार्वजनिक भएको नतिजामा पनि आ.व. २०७९-८० मा पनि बुढीगंगाले ८४ दशमलव ५० अंक ल्याएर जिल्लाका ९ पालिका मध्ये पहिलो र सुदूरपश्चिम प्रदेशकै तेस्रो स्थानमा आउन सफल भएको थियो ।

यस बर्ष सुदूरपश्चिममा पहिलो भने कैलालीको घोडाघोडी नगरपालिका ८५ दशमलव ५० अंक ल्याएर प्रथम भएको छ । त्यस्तै मन्त्रालयले सार्वजनिक गरेको संस्थागत क्षमता स्वमूल्याङ्कन नतिजा अनुसार बाजुरामा सबैभन्दा कम बुढीनन्दा नगरपालिका देखिएको छ ।

बुढीनन्दाले ६१ दशमलव ७५ अंक ल्याएर पुच्छारमा रहेको छ । त्यस्तै बडीमालिका नगरपालिका ८३ दशमलव ५० अंक ल्याएर जिल्लामा दोस्रो भएको छ भने जगन्नाथ गाउँपालिकाले ८१ दशमलव ५० ल्याएर तेस्रो स्थान हाँसिल गरेको छ ।

त्यस्तै स्वामीकार्तिक खापर गाउँपालिकाले ८१, हिमाली गाउँपालिकाले ७५ दशमलव ५०, त्रिवेणीले ७४ दशमलव ७५, खप्तड छेडेदहले ७३ दशमलव ५० र गौमुल गाउँपालिकाले ६९ दशमलव ५० अंक हाँसिल गरेको छ ।

संघीय मामिला तथा सामान्य प्रशासन मन्त्रालयले स्थानीय तहको कार्यप्रक्रिया र उपलब्धिको लेखाजोखा गरी शासकीय पद्धति र विकास व्यवस्थापनमा गर्नुपर्ने सुधारका क्षेत्र पहिचान, आवधिक समीक्षाको आधार प्राप्त गर्न र स्थानीय सरकारबीच स्वस्थ प्रतिष्पर्धाको भावना जागृत गराउने उदेश्यले हरेक वर्ष लिजाको नतिजा सार्वजनिक गर्दै आएको छ ।