मुगु : छायाँनाथ रारा नगरपालिका-१० चराप गाउँमा वर्षातका कारण घर भत्किँदा ९ घर परिवार आवासविहीन भएका छन्। साउन ११ गतेदेखि १४ गतेसम्म परेको अविरल वर्षातका कारण छायाँनाथ रारा नगरपालिका-१० चराप गाउँका चार घर पूर्ण र पाँच घर आंशिक रूपले क्षति हुँदा ९ घर परिवार घरविहीन भइ छिमेकीहरूको घरमा बस्न बाध्य भएका छन्।

तीन दिनसम्म लगातार परेको वर्षातका कारण साउन १४ गते बेलुका ५ बजेतिर चार घर भत्किँदा सँगै जोडिएका अन्य पाँच घरमा आंशिक क्षति पुगेको स्थानीय देवी कृष्णा बुढाले जानकारी दिए। बुढाका अनुसार घर भत्किँदा मानवीय क्षति नभए पनि घरभित्र रहेका अन्न, भाँडाकुँडालगायत अन्य उपभोग्य सामग्री र धनमाल सबै नष्ट भएको छ।

जिल्ला प्रहरी कार्यालयले दिएको जानकारी अनुसार चारवटा घर पूर्ण रूपले क्षति भएका र सँगै जोडिएका अन्य घरहरू आंशिक क्षति भएका छन्। आवासविहीन भएकी श्रृजना बढुवालले भनिन्, ‘अहिलेसम्म कुनै पनि निकायले त्रिपालसम्म उपलब्ध गराएको छैन। छिमेकीहरूको घरमा शरण लिनु परेको छ।

खाने अन्न र भाँडाकुँडा सबै भत्किएका घर भित्र रहेका छन्।  छिमेकीहरूले दिएको अन्नपानी खाने गरेका छौं। मुचुल्का गर्न प्रहरी मात्र पुगेको छ। घर भत्किएको ५/६ दिन पुगिसक्यो सरकारी निकायबाट अहिलेसम्म राहत पाएका छैनौं।'

छायाँनाथ रारा नगरपालिका-१३ थार्पका हाल स्पेनमा बस्दै आएका अक्कल बोहोराले पीडित घर परिवारलाई १ बोरा चामल त्रिपाल, अन्य उपभोग्य सामग्री उपलब्ध गराएको उनले बताइन्। जिल्ला विपद् व्यवस्थापन समितिका संयोजक तथा प्रमुख जिल्ला अधिकारी कमल प्रसाद पाण्डेले राहत उपलब्ध गराउन ढिलाइ भएको बताए।

उनले स्थानीय तह राहत कार्यविधि २०८१ अनुसार पालिकाले तत्काल राहत उपलब्ध गराइ जिल्ला विपद् व्यवस्थापन समितिमा अनुमोदन गराउनुपर्ने प्रावधान अनुसार तत्काल राहत उपलब्ध गराउनुपर्ने बताए।