बाजुरा : गौमुल गाउँपालिकाले लागु गरेको देशका लागि २ दिन कार्यक्रमको कार्यान्वनका लागि गौमुल गाउँपालिका–२ का स्थानीय सक्रिय देखिएका छन् । गौमुल गाउँपालिकाको देशको विकासका लागि २ दिन श्रमदान गर्ने नीतिलाई कार्यान्वयन गर्ने स्थानीय सक्रिय रुपमा लागेका हुन् । 

स्थानीयले वडाका विभिन्न टोलमा सार्वजनिक कार्य गरेका छन् । वडा सदस्य प्रेम रोकायाको नेतृत्वमा स्थानीयले आज टोलका विभिन्न ठाउँमा सार्वजनिक संरचना निमार्ण तथा मर्मत गरेका छन् । वर्षाका कारण विभिन्न ठाउँमा भत्किएका सार्वजनिक संरचनाको मर्मत सम्भार गरिएको हो ।

आज स्थानीयको सहभागीतामा आँगरबाट वडा नम्बर ३ जोड्ने बाटो मर्मत गरेका छन् । त्यस्तै रनेडा टोलका स्थानीयले ईसीडी भवनको घेरबार समेत मर्मत गरेका छन् । वर्षाका कारण करिव १५ मिटर भत्किएको घेरबार मर्मत गरिएको हो ।

गाउँपालिकाको नीतिलाई स्थानीयले नियमित रुपमा कार्यान्वयन गरिरहेको वडा अध्यक्ष देव बहादुर रोकायाले बताए । उक्त कार्यमा कार्यपालिका सदस्य जवा सार्की, वडा सदस्य प्रेम रोकाया, रेडियो गौमुल सञ्चालक समिति सदस्य प्रकाश सार्की लगायत स्थानीय ५० बढीको सहभागीता रहेको थियो । 

आफुहरु खाली समयमा अरुको कुरा काट्न र नकरात्मक टिप्पणी गर्ने मात्र व्यस्त हुने तर विकासको नाममा सिन्को नभाँच्ने प्रवृत्तिको अन्त्यका लागि कार्यक्रम प्रभावकारी बन्दै गएको छ ।  सबै कामका लागि बजेट पर्खिनु पर्ने र राज्यकै सहारामा बाँच्नु पर्ने मानसिकताको अन्त्य गरी राज्यप्रति नागरिकको जिम्मेवारी बढाउन गाउँपालिकाले उक्त कार्य अघि बढाएको हो ।