धनगढी ः कञ्चनपुरमा मृत भेटिएका नेपाली कांग्रेसका भीमदत्त नगर सभापति अच्युत कलौनीको अन्त्येष्टि गरिएको छ ।शनिबार बिहान भीमदत्त नगरपालिका–१८ को मामाभान्जा चोक नजिकै मृत भेटिएका कलौनीको आइतबार महाकाली आर्यघाटमा अन्त्येष्टि गरिएको प्रहरीले जनाएको छ ।

कलौनीको अन्तिम संस्कार गर्नुअघि उनको पार्थिव शरीर नेपाली कांग्रेस जिल्ला पार्टी कार्यालयमा राखेर गृहमन्त्री रमेश लेखकसहितका कांग्रेस नेताहरुले श्रद्धाञ्जली दिएका थिए । कलौनीको शव परीक्षणपछि अन्तिम संस्कार गरिएपनि उनको मृत्युको कारण अहिलेसम्म खुलेको छैन ।

भेरी प्रादेशिक अस्पतालका विशेषज्ञ चिकित्सकको टोलीले महाकाली प्रादेशिक अस्पातलमा शव परीक्षण गरेका हुन् तर शव परीक्षणको रिर्पोट आइसकेको छैन । जिल्ला प्रहरी कार्यालयका प्रवक्ता प्रहरी नायब उपरीक्षक(डीएसपी) उमेशराज जोशीले कलौनीको मृत्यु के-कसरी भयो ? भन्ने कुरा नखुलेको बताए ।

उनको शरीरमा बाहिर देखिने घाउ, चोटपटक नभएको बताउँदै शव परीक्षण रिर्पोटपछि धेरै कुरा खुल्ने विश्वास प्रहरीले लिएको छ । तर, शुक्रबार राति भने कलौनी शव भेटिएको स्थान नजिकै हिंडिरहेको दृष्य सीसीटीभी क्यामेरामा कैद भएको देखिएको प्रहरीले जनाएको छ ।

जिल्ला प्रहरी कार्यालयका प्रमुख चक्रराज जोशीले राति करीब साढे ९ बजेको समयमा कलौनी शव भेटिएको स्थान नजिकै हिंडिरहेको फुटेजमा देखिएको बताए । तर, शव भएको स्थानसम्म सीसीटीभी क्यामेराको पहुँच नभएकाले घटनाबारे यकिन गर्न नसकिएको उनी बताउँछन् ।

‘शुक्रबार राति करीब साढे ९ बजेको समयमा उहाँ (कलौनी) शव भेटिएको स्थान नजिकै सडकपेटीमा एक्लै हिंडिरहेको दृष्य सीसीटीभीमा देखिएको छ,’ एसपी जोशीले भने, ‘तर शव भएको ठाउँमा क्यामेराको एक्सेस देखिएन । त्यसैले अहिले नै केही भन्न सक्ने अवस्था छैन । अनुसन्धान गर्दैछौँ ।’

राति साथीहरुसँग छुट्टिएर एक्लै घरतर्फ हिंडेका थिए

पारीवारिक स्रोतकाअनुसार कलौनी धनगढी जाने भन्दै शुक्रबार घरबाट निस्किएका थिए । तीन जना साथीसँगै धनगढी आएका उनी अबेर साँझ मात्र महेन्द्रनगर पुगेका थिए ।

एसपी जोशीकाअनुसार साँझपख महेन्द्रनगर पुगेका उनीहरु मदन चोकबाट छुट्टिएका थिए । कलौनीसँगै धनगढी आएकाहरुले प्रहरीलाई बताएअनुसार हिंडेर घर जाने भन्दै उनी गाडीबाट ओर्लिएका थिए ।

‘उहाँहरुसँग मृतक कलौनी शुक्रबार साँझ मदनचोकबाट छुट्टिएको देखिनुहुन्छ । त्यसपछि पेट र छाती दुःख्यो भनेर महाकाली प्रादेशिक अस्पताल पुगेर औषधी लिनुभएको छ,’ एसपी जोशीले भने, ‘उहाँको खल्तीमै ग्याष्ट्रिकको ट्याबलेट पनि भेटिएको छ ।’

प्रहरीकाअनुसार दिउँसो कलौनीसँगै भएका तीन जनासँग सोधपुछ गर्दै कागज समेत गरिएको छ । मृतकका परिवारले कलौनीको हत्या भएको आशंका गरेपनि प्रहरीले हालसम्म मृत्यु कसरी भएको हो ? भनेर भन्न सकिने अवस्था नरहेको जनाएको छ ।

कलौनीले बोकेको मोबाईल फोन समेत फेला परेको छैन । मोबाईलको खोजी भइरहेको प्रहरी बताउँछ । मोबाईल फेला नपर्नुले उनको हत्या गरिएको आशंका परिवारले गरेको छ ।

प्रहरीले भने घटनाको मसिनो गरि विभिन्न कोणबाट अनुसन्धान जारी रहेको जनाएको छ । उनको भिशेरा परीक्षणका लागि नमूना संकलन गरिएकाले नेपाल प्रहरीको केन्द्रीय विधी, विज्ञान प्रयोशाला पठाइने जिल्ला प्रहरी कार्यालयले जनाएको छ ।