बाजुरा : जिल्ला सदरमुकाम मार्तडी बजार क्षेत्रको सडक छेउमा राखिएका निर्माण सामग्री तथा सवारी साधन हटाउने निर्णय गरिएको छ । आईतबार जिल्ला समन्वय समिति बाजुराले बोलाएको सर्वपक्षीय बैठकबाट बडीमालिका नगरपालिकाको दुनीहाटबजार र माथिल्लो बजारका सडक छेउमा राखिएका निर्माणका सामग्री र सवारी साधन हटाउन लगाउने र हटाउन आग्रह गर्दा नमाने कानुनी कारबाही गर्ने निर्णय गरिएको छ ।

जिल्ला समन्वय समिति बाजुराका  समन्वय अधिकारी दीपेन्द्र पाण्डेका अनुसार  समन्वय समितिको कार्यालयमा बसेको बैठकले मार्तडी बजारको सरसफाईको लागि सरकारी गैरसकारी कार्यालयहरु, सुरक्षा निकाय, विद्यालय, होटल व्यवसायी, व्यापारी लगायत सरोकारवाला निकाय र व्यक्तिहरुबीच सहकार्य गर्ने, बजारको मुख्य क्षेत्रमा सीसीटिभी क्यामरा जडान गर्न बडीमालिका नगरपालिकालाई आग्रह गर्ने र बजार व्यवस्थापन समिति, उद्योग वाणिज्य संघ र वडा नम्बर ८ र ९ को नेतृत्वमा मार्तडी बजारका हरेक पसल र घरमा अनिवार्य डस्टबीन राख्न लगाउने निर्णय भएको छ ।

यस्तै बैठकले सडकको छेउछाउमा राखिएका निर्माण सामग्री, बिग्रेका सवारी साधन तथा ट्याक्टर हटाउन अनुरोध गर्ने र अटेरी गरेमा कारबाही गरिने भएको छ । मार्तडी बजारलाई फोहर मुक्त बनाउनका लागि प्रत्येक शनिबार समन्वय समितिको अगुवाईमा सरसफाई अभियान सञ्चालन हुँदै आएको छ ।

बजार क्षेत्रमा देखिएका फोहरवस्तुहरु उचित ठाउँमा व्यवस्थापन गर्नका लागि समन्वय समितिले हरेक शनिबार सरसफाई अभियान सञ्चालन गरेको छ । समन्वय समितिका प्रमुख तुलसीराम रोकायाको अध्यक्षतामा बसेको बैठकमा निमित्त प्रमुख जिल्ला अधिकारी रुपक मण्डल, बडीमालिका नगरपालिका–८ र ९ का वडा अध्यक्ष, सुरक्षा निकायका प्रमुख तथा सरोकारवाला निकायका प्रमुख तथा प्रतिनिधिहरुको सहभागीता रहेको थियो  ।