बाजुरा : गौमुल गाउँपालिका–६ बसालामा रहेको घटाल आधारभूत विद्यालयले विजया दशमी तथा शुभदीपावलीको अवसर पारेर कार्यक्रम आयोजना गर्ने भएको छ ।

विद्यालयले बृहत् साँस्कृतिक कार्यक्रम र वडा स्तरीय पुरुष भलिबल प्रतियोगीता आयोजना गर्ने गरी तयारी गरेको विद्यालय व्यवस्थापन समितिका अध्यक्ष कलक चदाँराले बताएका छन् ।

विगतका वर्षमा विभिन्न गतिविधि सञ्चालन गर्दै आएको उक्त विद्यालयले यस वर्षपनि विभिन्न सचेतनामूलक साँस्कृतिक कार्यक्रमका साथ खेलकुदका गतिविधि र डेउडा प्रतियोगीता आयोजना गरिएको चदाँराले बताएका छन् ।

कार्यक्रममा विद्यालयको शैक्षिक गुणस्तर सुधारमा अभिभावकले खेल्नुपर्ने भूमिका र शिक्षकले पालना गर्नुपर्ने कर्तव्य केन्द्रीत सन्देश दिने खालका नृत्य समेत प्रस्तुत गरिने प्रधानाध्यापक हर्क बहादुर थापाले बताएका छन् ।

विगतमा शैक्षिक गुणस्तर सुधारमा राम्रो प्रभाव पारेको उक्त विद्यालयले सन्देशमूलक गतिविधिमा समेत उत्तिकै क्रियाशीलता कायम राखेको छ । कार्यक्रम कार्तिक ११ गते आईतबारबाट आयोजना गरिने गरी सम्पूर्ण तयारी गरिएको छ ।

कार्तिक ११ गते वडा स्तरीय पुरुष भलिबल प्रतियोगीता र कार्तिक १२ गते औपचारिक कार्यक्रमका बीच महिला डेउडा प्रतियोगीता र विद्यालयका नृत्य तथा बृहत् साँस्कृतिक कार्यक्रमका साथ सञ्चालन गरिने भएको छ ।

कार्यक्रममा सहभागीताका लागि सेवा क्षेत्रका अभिभावक, शुभेच्छुक, सरोकारवाला निकाय तथा सम्पूर्ण व्यक्तित्वको उपस्थितिका लागि विद्यालय परिवारका तर्फबाट आग्रह गरिएको छ ।