बाजुरा : जिल्लाको हिमाली गाउँपालिका–२ रुम्दीमा सुख्खा पहिरो जाँदा कवाडी खोला थुनिएको छ । शुक्रबार विहान १० बजेर ३० मिनेट जाँदा सोही पालिकाको वडा नम्बर २ र ५ को बीचमा पर्ने कवाडी खोला थुनिएको हिमाली गाउँपालिकाका निमित्त प्रमुख प्रशासकीय अधिकृत राज बहादुर भण्डारीले जानकारी दिएका छन् ।

उनका अनुसार दुई वटै वडाको सिमानामा रुपमा रहेको कवाडी खोला माथिको जंगलबाट सुख्खा पहिरो खस्दा खोला थुनिएको बताए । कर्णाली नदीसंग जोडिएको उक्त खोला थुनिएपछि कर्णाली र कवाडी आसपास क्षेत्रका स्थानीयहरुलाई सतर्कता अपनाउन गाउँपालिकाले सार्वजनिक सूचना जारी गरेको छ ।

गाउँपालिकाको पर्यटकीय क्षेत्र रानीसैन हुँदै बग्ने कवाडी खोला एकाएक पहिरोले थुनिएपछि जोखिम बढ्ने भएकाले सतर्कता अपनाउन कर्णाली नदी आसपासका नागरिकलाई जोखिमबाट टाढा रहन आग्रह गरिएको छ ।

पहिरोले खोला थुनिएपछि पानीको बहाव बढ्ने भएकाले आसपासमा नजान र सतर्कता अपनाउन स्थानीयहरुलाई खबर गरेको हिमाली गाउँपालिकाका अध्यक्ष गोविन्द्र बहादुर मल्लले बताए । उनले थुनिएको खोला एकतर्फीबाट बग्न सुरु भएको र प्रहरी र स्थानीयहरु घटनास्थलमै तैनाथ रहेको गौमुल खबरसंग बताएका छन् ।

नदीको बहाव बढ्दै गएकाले स्थानीयहरु भने त्रसित बन्दै गएका छन् । नदी थुनिएको खबर आएकोले प्रहरी समेत परिचालन गरिएको प्रमुख जिल्ला अधिकारी भीमकान्त पौडेलले बताए । खोला विस्तारै एकातर्फबाट खुल्न थालेको बताईएको छ ।