बाजुरा : बुढीगंगा नगरपालिकामा कालोपत्रे गर्ने सडकहरुको निर्माण कार्य तीव्र गतिमा अघि बढेको छ । बाम्का बजार देखि पालिका केन्द्रसम्म ढलान कार्य तीव्र रुपमा भईरहेको छ । करिव ३ किलोमिटर सडक ढलान गरिने भएको छ ।

८ करोड ५५ लाख ३४ हजार भ्याट सहित महागौरी हण्डित दीप जे.भी. कम्पनीले निर्माण गरिरहेको छ । जे.भी. का आधिकारिक प्रतिनिधि हिरा रोकायाका अनुसार ०८२ असार मसान्तसम्म निर्माण गर्ने गरी सम्झौता भएको बर्ताएका छन् ।

अहिले सडक निर्माण कार्य तीव्र रुपमा जारी रहेको छ । सडकको करिव ३० प्रतिशत निर्माण कार्य सकिएको छ । बुढीगंगा नगरपालिकाले आफ्नै लगानीमा सडक कालोपत्रे गर्ने गरी कार्य तीव्र गतिमा सुरु गरेको छ ।

पालिकामा नयाँ नेतृत्व आएसंगै गरेको निर्णयलाई कार्यान्वयन गर्दै नगरपालिकाले दुई वटा सडक आफ्नै लगानीमा कालोपत्रे गर्न लागेको हो । वडा कार्यालय जोड्ने सडकलाई कालोपत्रे गर्न लागिएको नगर प्रमुख रामबहादुर बाँनियाले बताएका छन् ।

बजेटका लागि संघ र प्रदेश सरकारकै मुख ताक्ने र उनीहरूकै भरपर्दा कालोपत्र गर्ने काम अनिश्चित हुने देखिएपछि आफ्नै लगानीमा सडक कालोपत्रे गर्ने कार्य द्रुत गतिमा चलेको बताए ।

पालिकामा आउने बजेट हाललाई संघीय अनुदान नै भए पनि पूर्वाधार विकास अन्तर्गत पालिका जोड्ने सडकलाई सहज बनाउन कालोपत्रे गर्न लागिएको नगर उपप्रमुख माया कुँवरले बताएकी छन् ।

कालोपत्रेका लागि विनियोजित बजेटमध्ये केही स्रोत नगरपालिकाको आन्तरिक पनि रहने बताईएको छ । तीन वटा रणनीतिक सडक कालोपत्रे गरिने भएको छ । बेतालमाडौंदेखि त्रिशक्ती मावि हुँदै जुवापानीसम्म कालोपत्रे सडकमा ९ करोड १३ लाख २५ हजार रकम रहेको छ ।

दोस्रो ताँप्रीसेरादेखि नडाग सम्मको सडक कालोपत्रे गर्न ११ करोड ३२ लाख ७८ हजार बजेट सहित सडक निर्माण कार्य भईरहेको छन् । यो सडकले २ र ३ नम्बर वडालाई छुनेछ ।

दुबै सडकमा ५/५ किलोमिटर कालोपत्रे गर्ने तय गरिएको छ । दुबै सडक निर्माणको जिम्मा बङ्लामुखी जे.भी.निर्माण सेवाले लिएको छ । दुबै सडक कालोपत्रे गर्न बुढीगंगाले २० करोड रूपैयाँ खर्च गर्ने प्रमुख प्रशासकीय अधिकृत नरेन्द्र नाथले बताएका छन् ।

आगामी ०८२ असार मसान्तभित्र दुई वटै ग्रामीण सडक करिब ५/५ किलोमिटर पक्की बनाउने गरी काम तीव्र जारी रहेको नगरपालिकाका इन्जिनियर उपेन्द्र साउँदले बताएका छन् । कामको प्रत्यक्ष निगरानी नगरपालिकाले गरिरहेको छ । बुढीगंगा नगरपालिकाले निर्णयको शीघ्र रुपमा विलम्ब नगरी कार्यहरु अघि बढाईरहेको छ ।