बाजुरा : शैक्षिक क्षेत्र सुधारका लागि गौमुल गाउँपालिकामा समीक्षा गरिएको छ । शिक्षा क्षेत्रमा लगाएको लागानी अनुसार शिक्षाको गुणस्तर वृद्धि नहुनुको कारण र आगामीक दिनमा खेल्नुपर्ने भूमिकाको विषयमा जनप्रतिनिधी, शिक्षक र विद्यार्थीबीच समीक्षा गरिएको हो । 

गौमुल गाउँपालिकाको समन्वय सहयोगि हातहरुको समूह (सहास) नेपाल समावेशी तथा गुणस्तरीय शिक्षा परियोजनाको आयोजनामा समीक्षा सञ्चालन गरिएको हो । समीक्षामा शैक्षिक गुणस्तर सुधार गर्नुपर्ने पक्ष, स्थानीय सरकार र विद्यालयले खेल्नुपर्ने भूमिका र बनाउनु पर्ने योजनाका विषयमा छलफल भएको थियो । 

गाउँपालिकाको सभाहलमा सञ्चालन भएको समीक्षामा शिक्षाको गुणस्तर वृद्धि गर्न चुनौति रहेपनि सबैले गतिलो किसिमको भूमिका खेले सम्भव रहेको बताईएको छ । बाजुरा जिल्लामा ७१ प्रतिशत मात्रै साक्षरताको तथ्याङ्क रहेको छ ।

यो तथ्याङ्कलाई हेर्दा बाजुराको शिक्षाको गुणस्तर विस्तारै ओरालोमा लागेको देखिन्छ । शिक्षा सुधारका लागि परिवर्तन गर्न सबैले सक्रिय भूमिका निर्वाह गर्नुपर्ने अवस्था आएको कार्यक्रममा सहभागिहरुले बताएका छन् ।

जनशक्ति अभाव र जवाफदेहिता कम भएर गुणस्तरीय शिक्षा सुधार नभएको निष्कर्ष सहीत कुनै पनि काम गर्दा एक अर्कोमा विश्वस र भरोसा हुनुपर्ने र त्यो विश्वस जागृत गर्नका लागि सबै भन्दा पहिले सोच परिवर्तन हुन आवश्यक बताईएको छ । 

समीक्षा गोष्ठीको प्रशिक्षण सहास नेपाल समावेशी तथा गुणस्तरीय शिक्षा परियोजना अधिृत दिलबहादुर धामीले गरेका थिए । उनले सद्भाव, सहकार्य, सम्बन्ध र इमान्दारीताले शिक्षाको गुणस्तर सुधार गर्न सम्भव रहेको बताउँदै शिक्षक इमान्दारी, विद्यार्थी समझदारी, अभिभावक वफादार तथा जिम्मेवार र स्थानीय सरकार पहरेदार हुनुपर्ने बताए ।

दिमाख र हातको संयोजनसहित धेरै हातहरु एकसाथ भएमात्रै शिक्षा बलियो हुने कुरा बताउँदै विद्यार्थी विद्यालयबाट भागेर घर होइन्, घरबाट भागेर विद्यालय जाने वातावरण बनाउनु पर्ने धामीले बताएका छन् । 

शिक्षा सुधारका लागि  सचेतना, आशावादी, इमान्दारीता, सदाचारी नेतृत्व हुनेपर्ने सहास नेपालका शिक्षा सहजकर्ता उमेश बोहराले बताएका छन् । विद्यार्थीको क्षमता अभिवृद्धिका लागि खानपानमा विशेष ध्यान दिने र साँझा बुझाईका साथ अगाडी बढ्नुपर्ने उनले बताए ।

समीक्षामा गौमुल गाउँपालिका अध्यक्ष हरि बहादुर रोकायाले आफ्नो जिम्मेवारी काम मनभित्र देखि गरेपछि असफल नहुने बताएका छन् । विद्यार्थीले औपचारिकतामा मात्रै सिमित नभई आफ्नो कर्तव्य पालना गर्न र विद्यालयमा विद्यार्थीको आकर्षण बढाउने खालको वातावरण बनाउनु पर्नेमा जोड दिएका छन् । 

अध्यक्ष रोकायाले शिक्षकले विद्यार्थीलाई धेरै ज्ञान प्रदान गर्न पठनपाठनमा रचनात्मक ढंगले शिक्षण गराउनु पर्ने बताउँदै विद्यालय सेवा क्षेत्रभित्रका व्यक्तिहरुले आआफ्नो कर्तव्य र अधिकारलाई सही ढंगले पालन गरे विद्याय सुधार गर्न धेरै टाढको विषय नरहेको बताए । 

गाउँपालिकामा शिक्षाको गुणस्तर सुधार गर्नका लागि धेरै प्रकारका छलफल गरिदै आएको र अहिलेको नीति तथा कार्यक्रममा सुधारका पक्ष समेटेर थप बलियो ढंगले अगाडी बढ्ने योजना रहेको अध्यक्ष रोकायाले बताएका छन् । 

गौमुल गाउँपालिकाको सभाहलमा सञ्चालन भएको समीक्षामा गाउँपालिका अध्यक्ष हरि बहादुर रोकाया, उपाध्यक्ष सीता थापा, ६ वटै वडाका वडाध्यक्ष, कार्यपालिका सदस्य, प्रमुख प्रशासकीय अधिकृत जगदिश प्रसाद भट्ट, शिक्षक, विद्यार्थी लगायतको सहभागिता रहेको थियो ।