बाजुरा ःबाढी पहिरोबाट प्रभावित बडीमालिका नगरपालिका र गौमुल गाउँपालिकाका १२९ परिवारलाई राहत सामग्री वितरण गरिएको छ । प्लान इन्टरनेशनल नेपाल, पीसविन नेपाल र महिला विकास मञ्च, बाजुराको सहकार्यमा स्थानीय तहको क्षति तथा जोखिम मूल्याङ्कन र सिफारिसका आधारमा प्रभावित परिवारलाई राहत सामग्री उपलब्ध गराइएको हो ।

पीसविन नेपालका परियोजना संयोजक पदम कठायतका अनुसार राहत पाउने परिवार मध्ये बडीमालिका नगरपालिकाका ८३ र गौमुल गाउँपालिकाका ४६ परिवार रहेका छन् । तीमध्ये १४ परिवारका घर पूर्ण रुपमा क्षति भएका छन् भने ११५ परिवार बाढी पहिरोका कारण उच्च जोखिममा रहेका छन् ।

घर पूर्ण रुपमा क्षति भएका १४ परिवारलाई प्रतिपरिवार ८ हजार ८६९ रुपैयाँ १४ पैसा बराबरको गैरखाद्य जीवन रक्षक सामग्री (एनएफआई) किट, १ हजार ७६८ रुपैयाँ ७७ पैसा बराबरको किचेन सेट तथा ४ हजार ५४६ रुपैयाँ १६ पैसा बराबरको मर्यादित सामग्री उपलब्ध गराइएको छ ।

त्यस्तै, उच्च जोखिममा रहेका ७७ परिवारलाई प्रति परिवार एनएफआई किट र मर्यादित सामग्री तथा थप ३८ परिवारलाई एनएफआई किट र स्वच्छता सामग्री वितरण गरिएको जनाइएको छ ।

एनएफआई किटमा त्रिपाल दुई थान, फ्लिस कम्बल दुई थान, पी-फोम गद्दा दुई थान र सोलार बत्ती एक थान रहेका छन् । मर्यादित सामग्रीमा साबुन, डिटर्जेन्ट, कपडा, स्वेटर, सल, महिनावारी प्याड, तौलिया, टर्च लाइट, टुथपेस्ट, टुथब्रस लगायत दैनिक जीवनमा आवश्यक सामग्री समावेश छन् ।

पूर्ण रुपमा घर क्षति भएका परिवारका लागि खाना पकाउने तथा खाने सामग्री सहितको किचेन सेट समेत उपलब्ध गराइएको छ । किचेन सेटमा विभिन्न आकारका डेक्ची, डिनर प्लेट, कचौरा, गिलास, डाडु र पन्यू लगायत सामग्री रहेका छन् ।

त्यसैगरी, स्वच्छता सामग्री आवश्यक भएका परिवारलाई साबुन, महिनावारी प्याड, तौलिया, टुथपेस्ट, टुथब्रस, बाल्टी, पानी शुद्धीकरण गर्ने क्लोरिन ट्याब्लेट, मग तथा कपडा छान्ने फिल्टर लगायत सामग्री वितरण गरिएको छ ।

राहत अन्तर्गत कुल १७ लाख १ हजार १९५ रुपैयाँ ६० पैसा बराबरका सामग्री प्रभावित परिवारसम्म पुर्‍याइएको आयोजक संस्थाले जनाएको छ । विपद्का कारण घर तथा दैनिक उपभोग्य सामग्रीमा क्षति पुगेका परिवारलाई लक्षित गरी गरिएको सहयोगले तत्कालीन आवश्यकता पूरा गर्न तथा दैनिक जीवन केही सहज बनाउन सहयोग पुग्ने अपेक्षा गरिएको छ ।

राहत वितरण कार्यक्रममा सहभागी गौमुल गाउँपालिकाकी उपाध्यक्ष सीता थापाले विपद्को कठिन अवस्थामा प्रभावित परिवारलाई आवश्यक राहत सामग्री उपलब्ध गराएकोमा प्लान इन्टरनेशनल नेपाल, पीसविन नेपाल र महिला विकास मञ्च, बाजुराप्रति धन्यवाद व्यक्त गर्नुभयो । उहाँले प्राप्त राहत सामग्रीले विपद्पीडित परिवारको दैनिक जीवन सहज बनाउन महत्वपूर्ण सहयोग पुगेको बताउनुभयो ।