बाजुरा ःधार्मिक तथा पर्यटकीय दृष्टिले प्रसिद्ध बाजुराको बडीमालिका मन्दिरमा हुने मुख्य पूजाका लागि बाजुराको सरकारी टोली पूजा सामग्री सहित सोमबार बडीमालिकातर्फ प्रस्थान गरेको छ ।

सदरमुकाम मार्तडीस्थित मालिका मन्दिरमा पूजाआजा गरेपछि सरकारी टोलीलाई सुरक्षाकर्मीको सलामी, बाजागाजा र फूलमाला सहित बिदाइ गरिएको हो । पञ्चकन्या तथा महिलाले जमराको टोकरी शिरमा राखेर टोलीको बिदाइ गरेका थिए ।

बडीमालिका नगरपालिकाका प्रमुख अमरबहादुर खड्का, उपप्रमुख नन्दा थापा, जिल्ला प्रहरी प्रमुख प्रहरी नायब उपरीक्षक शैलेश्वरी बोहराल गायतको एकीकृत सरकारी टोली बडीमालिकातर्फ प्रस्थान गरेको प्रमुख जिल्ला अधिकारी डोरेन्द्र निरौलाले जानकारी दिए ।

देशका विभिन्न जिल्लाका साथै छिमेकी मुलुक भारतबाट समेत भक्तजन केही दिन अघिदेखि बडीमालिका र बुढीनन्दातर्फ जान थाले पनि सरकारी तथा औपचारिक यात्रा भने सोमबारबाट सुरु भएको हो । बुढीनन्दातर्फ जिल्लाको सरकारी टोली यस अघि नै प्रस्थान गरिसकेको छ ।

प्रमुख जिल्ला अधिकारी निरौलाका अनुसार जिल्ला प्रहरी प्रमुखको नेतृत्वमा समेत टोली बडीमालिका पुगेकाले त्यहाँको सुरक्षा व्यवस्था थप प्रभावकारी बनाइएको छ । सरकारी टोली बडीमालिका प्रस्थान गरेको अवसरमा बडीमालिका नगरपालिकाले सोमबार सार्वजनिक बिदा समेत दिएको छ ।

नगरप्रमुख खड्काका अनुसार सरकारी टोली पहिलो दिन सोता पाटन, दोस्रो दिन त्रिवेणी पाटन हुँदै तेस्रो दिन बडीमालिका मन्दिर पुग्नेछ । बडीमालिका र बुढीनन्दा दिदी बहिनीका रुपमा पूजिने धार्मिक मान्यता अनुसार दुवै शक्तिपीठमा जनैपूर्णिमाको अघिल्लो दिन अर्थात् भदौ ११ गते मुख्य पूजा हुने परम्परा छ ।

भक्तजनको चाप बढ्दै गएपछि एकैदिन सबैलाई पूजा गर्न कठिन हुने भएकाले यस वर्ष भदौ १ गतेदेखि नै बडीमालिकामा पूजा सुरु गरिएको नगर प्रमुख खड्काले बताएका छन् ।

धार्मिक विश्वास अनुसार सत्ययुगमा भगवान् शिवले सतीदेवीको शरीर बोकेर संसारभर घुमाउने क्रममा बडीमालिका क्षेत्रमा शरीरको अंग खसेको र सोही स्थानमा देवीको पुनः अवतार भएको मानिन्छ । यही धार्मिक आस्थाका कारण बडीमालिका माताको दर्शन तथा पूजापाठ गरे मनोकाङक्षा पूरा हुने जनविश्वास रहेकाे छ ।

बडीमालिका क्षेत्रमा २२ आकर्षक पाटन, खेतीबेती, त्रिवेणी धाम लगायत धार्मिक तथा पर्यटकीय स्थल रहेका छन् । धार्मिक पूजा आराधनासँगै प्राकृतिक सौन्दर्यको अवलोकन गर्न समेत देशका विभिन्न स्थानबाट तीर्थयात्री तथा पर्यटक बडीमालिका पुग्ने गरेका छन् ।

यस वर्ष विगतका तुलनामा बडीमालिका दर्शन गर्न आउने भक्तजनको सङ्ख्या अझै बढ्ने अनुमान गरिएको छ । बडीमालिका पूजाका लागि डोटी, जुम्ला, कालिकोट तथा कैलालीको धनगढी उपमहानगरपालिकाबाट सरकारी टोली यसअघि नै प्रस्थान गरिसकेको छ । सुदूरपश्चिम प्रदेश सरकारले पनि पूजा सामग्री सहित सरकारी टोली पठाइसकेको छ ।

बडीमालिका मन्दिर समुद्री सतहबाट करिब ४ हजार २ सय मिटर उचाइमा अवस्थित छ । यस वर्ष तीर्थयात्रीको सहजताका लागि बडीमालिका क्षेत्रमा टेलिफोन तथा इन्टरनेट सेवा विस्तार गर्ने उद्देश्यले नेपाल टेलिकमको फोरजी टावर जडान गरिएकाे छ ।

बाजुराका प्रमुख धार्मिक शक्तिपीठ बडीमालिका र बुढीनन्दामा हरेक वर्ष देशका विभिन्न स्थान तथा भारतबाट समेत ठूलो सङ्ख्यामा श्रद्धालु पुग्ने गरेका छन् । आस्था, धार्मिक परम्परा र प्राकृतिक सौन्दर्यको संगमका रुपमा रहेको बडीमालिकाको यस वर्षको यात्रा अझै भव्य बन्ने अपेक्षा गरिएको छ ।