बाजुरा ःबाजुराको गौमुल गाउँपालिकामा १० शैयाको अस्पताल सञ्चालनमा आएको छ । गौमुल गाउँपालिका-२ मालिवनमा निर्माण गरिएको अस्पताल बुधबारदेखि औपचारिक रुपमा सञ्चालनमा आएको हो ।

अस्पतालको औपचारिक उद्घाटन गाउँपालिका अध्यक्ष हरिबहादुर रोकायाले रिबन काटेर गरेका हुन् । अस्पताल सञ्चालनमा आएसँगै दुर्गम तथा ग्रामीण क्षेत्रका नागरिकले सामान्य स्वास्थ्य उपचारका लागि टाढा सदरमुकाम तथा अन्य ठाउँमा धाउनुपर्ने बाध्यता केही हदसम्म अन्त्य हुने अपेक्षा गरिएको छ ।

अस्पताल उद्घाटन कार्यक्रममा गाउँपालिका उपाध्यक्ष सीता थापा, वडा अध्यक्षहरु देवबहादुर रोकाया, अमर विक, गोरख बोहरा, देवेन्द्र रोकाया लगायत जनप्रतिनिधि, कर्मचारी तथा स्थानीय नागरिकको सहभागिता रहेको थियो ।

लामो समयदेखि आधारभूत स्वास्थ्य सेवाका लागि विभिन्न समस्या झेल्दै आएका गौमुलबासीका लागि १० शैयाको अस्पताल सञ्चालनमा आउनु महत्वपूर्ण उपलब्धिका रूपमा लिइएको छ । स्थानीय तहको केन्द्र भन्दा टाढा रहेका बस्तीका नागरिकले अब गाउँमै स्वास्थ्य परीक्षण तथा उपचारको सुविधा पाउने भएका छन् ।

विशेषगरी बिरामी, ज्येष्ठ नागरिक, महिला तथा बालबालिकालाई सामान्य उपचारका लागि समेत लामो दूरीको यात्रा गर्नुपर्ने बाध्यता रहेकामा अस्पताल सञ्चालनले स्वास्थ्य सेवामा पहुँच सहज बनाउने विश्वास गरिएको छ ।

गौमुलमा अस्पताल सञ्चालनमा आएसँगै ‘दुर्गमका नागरिकको स्वास्थ्य अधिकार गाउँमै’ भन्ने उद्देश्यलाई थप बल पुगेको स्थानीयको भनाइ छ ।

अस्पताललाई प्रभावकारी रुपमा सञ्चालन गर्दै आवश्यक स्वास्थ्य सेवा, जनशक्ति र उपकरणको व्यवस्थापन गर्न सके यस क्षेत्रका नागरिकका लागि ठूलो राहत पुग्ने अपेक्षा गरिएको छ ।