बाजुरा ःबाजुराको सदरमुकाम मार्तडी बजार अब हरेक महिनाको १५ गते पूर्ण रुपमा बन्द हुने भएको छ । बजारलाई स्वच्छ, सफा र हरित बनाउने उद्देश्यले मार्तडी बजार व्यवस्थापन समितिले प्रत्येक महिनाको १५ गते नियमित सरसफाइ अभियान सञ्चालन गर्ने निर्णय गरेको हो ।

समितिको २०८३ साल जेठ ३० गते बसेको बैठकले उक्त निर्णय गरेको जनाएको छ । निर्णय अनुसार प्रत्येक महिनाको १५ गते औषधि, तरकारी तथा फलफूल पसल बाहेक अन्य सबै व्यापार-व्यवसाय बन्द रहनेछन् । सो दिन सम्पूर्ण व्यवसायी तथा सरोकारवालालाई सरसफाइ अभियानमा अनिवार्य रुपमा सहभागी हुन आग्रह गरिएको छ ।

बजार व्यवस्थापन समितिले यो अभियानलाई सफल बनाउन सबै व्यवसायी, स्थानीयबासी तथा सम्बन्धित निकायसँग सहयोगको अपिल गरेको छ । समितिका अनुसार सरसफाइलाई नियमित र प्रभावकारी बनाउँदै मार्तडी बजारलाई सफा, व्यवस्थित र वातावरणमैत्री बजारका रुपमा विकास गर्ने लक्ष्य राखिएको छ ।

निर्णयको अवज्ञा गर्दै बजार सञ्चालन गर्ने व्यक्ति वा व्यवसायीलाई जनही पाँच हजार रुपैयाँ जरिवाना गरिने समितिले चेतावनी दिएको छ । यस्तै, सरसफाइ अभियानमा सहभागी नहुने व्यवसायीलाई पाँच सय रुपैयाँ जरिवाना गरिने पनि निर्णयमा उल्लेख गरिएको छ ।

समितिले सबै व्यवसायी तथा नागरिकलाई अभियानलाई साझा जिम्मेवारीका रुपमा लिएर मार्तडी बजारलाई स्वच्छ, सफा र हरित बनाउने अभियानमा सक्रिय सहभागिता जनाउन अनुरोध गरेको छ ।