बाजुरा ः गौमुल गाउँपालिकाले दुर्गम बस्तीका नागरिकलाई सहज र प्रभावकारी सेवा प्रवाह गर्ने उद्देश्यले नयाँ वडा थप्ने ऐतिहासिक निर्णय गरेको छ ।

गाउँपालिकाको दोस्रो गाउँसभाको नवौं अधिवेशनले वडा नम्बर १ अन्तर्गतको अन्द्राडी तथा वडा नम्बर २ अन्तर्गतका पौदाली र मल्दुगुन क्षेत्रलाई समेटेर नयाँ वडा गठनका लागि प्रस्ताव अघि बढाउने निर्णय सर्वसम्मत रूपमा पारित गरेको हो ।

गाउँपालिका अध्यक्ष हरिबहादुर रोकायाका अनुसार भौगोलिक रुपमा अत्यन्त विकट रहेका यी बस्तीका नागरिकले स्थानीय तहका सेवा लिन लामो दूरी पार गर्नुपर्ने बाध्यता रहेको छ ।

सोही समस्यालाई सम्बोधन गर्दै जनतालाई आफ्नै नजिकबाट सेवा उपलब्ध गराउने उद्देश्यले नयाँ वडा थप्ने प्रस्ताव गाउँसभाबाट सर्वसम्मत रुपमा पारित गरिएको हो ।

“अन्द्राडी, पौदाली र मल्दुगुनका बासिन्दालाई न्याय हुने गरी नयाँ वडा गठनको प्रक्रिया अघि बढाउने निर्णय गाउँसभाले गरेको छ,” अध्यक्ष रोकायाले भने, “अब आवश्यक कानुनी प्रक्रिया पूरा गरी प्रदेश सरकार र संघीय सरकार समक्ष प्रस्ताव पेश गरिनेछ ।”

गाउँसभाले दुर्गम भूगोल, जनसंख्या वितरण, सेवा पहुँच तथा प्रशासनिक सहजतालाई आधार मानेर नयाँ वडा आवश्यक रहेको निष्कर्ष निकालेको जनाएको छ ।

नयाँ वडा गठन भएमा ती क्षेत्रका नागरिकले नागरिकता सिफारिस, सामाजिक सुरक्षा, योजना तथा अन्य स्थानीय सरकारका सेवाहरू सहज रूपमा प्राप्त गर्न सक्ने अपेक्षा गरिएको छ ।

गाउँपालिकाका जनप्रतिनिधिहरूले यो निर्णयले स्थानीय सरकारप्रति नागरिकको पहुँच अझ प्रभावकारी बन्ने, विकास निर्माणका कार्यक्रमहरू थप व्यवस्थित हुने तथा दुर्गम बस्तीका नागरिकले राज्यको अनुभूति नजिकबाट गर्न पाउने विश्वास व्यक्त गरेका छन् ।

गाउँसभाबाट पारित निर्णय अनुसार अब विस्तृत अध्ययन तथा आवश्यक कागजी प्रक्रिया पूरा गरी प्रदेश तथा संघीय सरकार समक्ष औपचारिक प्रस्ताव पठाइनेछ ।