बाजुरा ः बाजुराको जडाङ्गा खोलामा विगत केही वर्षदेखि प्रयोगविहीन अवस्थामा रहेको बेलिब्रिज पुल अब बुढीनन्दा नगरपालिका-२ स्थित दानसाँघु खोलामा स्थानान्तरण गरिने भएको छ ।

सरोकारवाला निकाय र स्थानीय समुदायबीच सहमति भएपछि पुल सार्ने काम औपचारिक रूपमा अघि बढाइएको हो।

बुढीनन्दा नगरपालिकाका उपप्रमुख रामबहादुर बोहराले गत मंसिर ४ गते दानसाँघु खोलामा आयोजित कार्यक्रममा पुल स्थानान्तरणको शिलान्यास गरेका थिए ।

हाल साँफे-मार्तडी सडकखण्डअन्तर्गत जडाङ्गामा रहेको उक्त बेलिब्रिज खोलाबाट निकालेर नयाँ स्थानमा जडान गर्ने प्रक्रिया सुरु गरिएको नगरपालिकाले जनाएको छ ।

नगर प्रमुख जनक कुमार बोहराका अनुसार यो पुल स्थानान्तरणले जिल्लाको पूर्वीत्तरी क्षेत्रमा रहेका कम्तीमा चार स्थानीय तहका बासिन्दालाई प्रत्यक्ष लाभ पुग्ने अपेक्षा गरिएको छ ।

“पहिले पनि दानसाँघुमा पुल सार्ने पहल भएको थियो, तर विवाद र बजेट अभावका कारण काम रोकिएको थियो,” उनले बताए ।

बुढीनन्दा नगरपालिकाको पहल र सडक डिभिजन कार्यालय साँफेबगर (अछाम) को आर्थिक सहयोगमा करिब २ करोड २२ लाख रुपैयाँ लागतमा पुल स्थानान्तरण कार्य भइरहेको छ ।

उक्त बेलिब्रिज करिब पाँच वर्षदेखि जडाङ्गा खोलामा प्रयोगविहीन अवस्थामा थियो । सुरुमा पक्की पुल नहुँदा यसको प्रयोग भए पनि पछि नजिकै स्थायी पुल निर्माण भएपछि यसको उपयोग बन्द भएको थियो ।

साँफे-मार्तडी सडकखण्ड अन्तर्गत अछामको साँफेबगरदेखि बाजुराको मार्तडीसम्म करिब ५७ किलोमिटर सडक रहेको छ । साथै, मार्तडी-कोल्टी खण्ड करिब ४२ किलोमिटर र कोल्टी-धुलाचौर खण्ड करिब १६ किलोमिटर लामो रहेको छ।