बाजुरा ः अनुरोस्ववियुका पूर्व महासचिव र एमालेका युवा नेता नरेशकुमार रोकायाले विकासको नयाँ मोडल गौमुल गाउँपालिकाबाट सिक्न संघीय सरकारलाई आग्रह गरेका छन् ।

गुह गाउँपालिकामा आयोजित छैटौँ राष्ट्रपति रनिङ शिल्ड प्रतियोगिताको उद्घाटन समारोहमा रोकायाले भौगोलिक रूपमा पिछडिएको जिल्लामा पनि जनतालाई अनुभव हुने विकास गरेका गौमुलको काम संघ र प्रदेश सरकारले अध्ययन गर्नुपर्ने बताएका छन् ।

उनी विद्यार्थीलाई किताबको ज्ञान मात्र होइन, अनुशासन र व्यवहारिक ज्ञान पनि जीवनका लागि आवश्यक हुने बताउँछन् । खेलकुद मार्फत अनुशासन र नेतृत्व गुण विकास गर्ने विषयमा उनले जोड दिएका छन् ।

“जीवनभर अनुशासन पालना गरेर अघि बढे पछाडि फर्केर हेर्नु पर्दैन,” रोकायाले भने । जिल्लाको समग्र विकासका लागि हरेक क्षेत्रको योगदान जरुरी रहेको भन्दै रोकायाले नागरिकहरु नेतामुखी नबन्न आवश्यक रहेको बताएका छन् ।

उनले मानव विकास सूचकांकमा ७७ औँ स्थानमा रहनुको कारण बाजुराको उपस्थिति उच्च तहमा नदेखिनु रहेको पनि बताएका छन् । शिक्षा क्षेत्रमा चुनौतीलाई दृष्टिगत गर्दै उनले भने, “विद्यालयहरूले मेधावी विद्यार्थी उत्पादन गर्न नसक्दा समस्या भइरहेको छ ।

समग्र बाजुराको शिक्षा विकासका लागि राज्यसँग माग गर्ने मात्र होइन, अधिकार हासिल गर्नैपर्छ ।” बाजुराले राज्यबाट खोस्ने र लिने गरी लाग्न जरुरी रहेको बताएका छन् ।