बाजुरा ःनेकपा (एमाले) का केन्द्रीय कमिटी सदस्य लालबहादुर थापाले विचार, सिद्धान्त र स्पष्ट गन्तव्य बिना खोलिएका राजनीतिक दलहरू देशलाई दिशा विहीन बनाउने बाहेक अन्य कुनै योगदान दिन नसक्ने टिप्पणी गरेका छन् ।

एमालेले देशभर सञ्चालन गरिरहेको ‘जनपरिचालन अभियान’का क्रममा शुक्रबार आफ्नो गृह जिल्ला बाजुरामा आयोजित विशाल जनसभालाई सम्बोधन गर्दै नेता थापाले विभिन्न नाममा दर्ता भएका तर जनसमर्थन र वैचारिक आधारविहीन दलहरूको आलोचना गरेका छन् ।

उनका अनुसार, “टाउको मात्रै भएको तर खुट्टा नभएका कागजी पार्टीहरूको कुनै भविष्य हुँदैन् । विचार र मार्गदर्शन विहीन दलहरू अवसर खोज्ने समूह बाहेक केही हुन सक्दैनन्,” नेता थापाले भन्नुभयो ।

थापाले यस्तो प्रकारका दलहरूको मुख्य उद्देश्य एमाले र पार्टी अध्यक्ष केपी शर्मा ओली विरुद्ध अपमानजनक टिप्पणी गर्नु मात्र रहेको आरोप लगाए । उनले भने, “उनीहरूको एक मात्र राजनीति भनेको एमाले र ओलीलाई गाली गर्नु हो ।

गाली गरेरै पूण्य कमाउने धर्म जस्तै बनाइदिएका छन् । तर जनताले अब यस्ता खोक्रा नारावाला दललाई समर्थन गर्ने छैनन् ।” थापाले देशलाई स्थिरता, विकास र सुशासनतर्फ डोर्याउन सक्षम र दृढ प्रतिबद्धता भएको पार्टी एमाले मात्र भएको दाबी गरे ।

उहाँले प्रतिगामी शक्ति र विदेशी स्वार्थमा लाग्ने तत्वहरूले देशलाई कमजोर बनाउन खोजिरहेको र त्यस्ता प्रयास विरुद्ध एमाले दृढ रहेको पनि उल्लेख गरेका छन् ।