बाजुरा : नेकपा एमाले जिल्ला कमिटी बाजुराको सातौं बैठक सकिएको छ । पार्टी केन्द्रले जारी गरेको अन्तर पार्टी निर्देशन सहीत विधान संसोधन प्रस्ताव सर्वसम्मत पारित गर्दै बैठक सकिएको हो । बाजुरा सदरमुकाम मार्तडी स्थित पार्टी कार्यालयमा बैठक बसेका थियो ।

जिल्ला अध्यक्ष लालबहादुर ओलीको अध्यक्षता र केन्द्रीय सदस्य एवं जिल्ला इन्चार्ज लालबहादुर थापाको प्रमुख आतिथ्यतामा बैठक बसेको हो । बैठकमा केन्द्रीय सदस्य सहदेव बोगटी र प्रदेश कमिटी सचिवालय सदस्य गगन रावल, कलकबहादुर सिंह सहित सहभागी थिए । 

पार्टी लेखा समितिले तयार पारेको प्रतिनिधी बारे छलफल र जिल्लाको विकास निर्माण, वर्षादको समयमा हुन सक्ने विपद जोखिम बारे छलफल गर्ने गरि बैठक बसेको थियो । बैठकले पार्टी केन्द्रीय कमिटीको निर्णय पछि जारी गरेको अन्तरपार्टी निर्देशन अनुसार विधान महाधिवेशनमा प्रस्तुत गरिने राजनीतिक, संगठनात्मक प्रतिवेदन र विधान संसोधन प्रस्ताव पारित गरेको छ ।

अपानीमा जारी कुनैपनि अक्षर र भाषागत लेखनलाई समेत तलमाथि नपार्ने गरी सर्वसम्मत पारित गरिएको पार्टी प्रचार तथा प्रकाशन विभाग प्रमुख राजन रोकायाले जानकारी दिएका छन् । रोकायाका अनुसार निर्णय बारे थप जानकारी पत्रकार सम्मेलन मार्फत जानकारी दिने बताएका छन् ।

नेकपा एमालेले दुई कार्यकालको सीमा र ७० वर्षे उमेर हदबन्दी खारेज गर्ने निर्णय सहित विधान महाधिवेशनमा लैजाने निर्णय गरेको थियो । भने राजनीतिमा सक्रिय हुने र अध्यक्ष बनेर नेतृत्व लिने चाहना राख्नु भएकी पूर्व राष्ट्रपति विद्यादेवी भण्डारीलाई गणतन्त्रको गौरवकै रुपमा स्थान कायम गरी स-सम्मान राख्ने निर्णयलाई एमाले जिल्ला कमिटीले सर्वसम्मत पारित गरेको छ । 

बैठकको सञ्चालन सचिव काँशी विकले गरेका थिए । जनताको जनजीवीकाको सवालमा एमाले सधै प्रतिवद्ध भएर क्रियाशील भइरहेको र यो बैठकले पनि त्यो एजेण्डालाई प्रमुख विषय बनाएर छलफल गरिएको पार्टी अध्यक्ष लालबहादुर ओलीले बताएका छन् ।

एमाले जिल्ला कमिटी ८९ सदस्यीय छ । त्यसमा नौ वटै पालिकाका अध्यक्ष पदेन सदस्यको रुपमा जिल्ला कमिटी बैठकमा बस्ने गरेका छन् । नौ पालिका कमिटी अध्यक्ष मध्ये त्रिवेणी नगर कमिटी र बुढीनन्दा नगर कमिटी बाहेकका सात वटै पालिका अध्यक्ष बैठकमा सहभागी थिए । यस्तै ८९ सदस्यीय जिल्ला कमिटी मध्ये ४७ जना सहभागि थिए ।