बाजुरा : नेपाल पत्रकार महासंघ जिल्ला शाखा, बाजुराले बडीमालिका यात्रा विशेष प्रचार अभियान सुरु गरेको छ । बडीकालिका धार्मिक यात्राको प्रबर्द्धनका लागि विशेष प्रचार अभियान सुरु गरिएको नेपाल पत्रकार महासंघ जिल्ला शाखा, बाजुराका अध्यक्ष पदम बहादुर सिंहले बताएका छन् ।

बडीमालिका धार्मिक यात्रा साउन २१ बाट सुरु हुनेछ । भने धार्मीक मेला साउन २३ गते लाग्नेछ । बडीमालिका सहित बुढीनन्दा, सुनन्दा बडालेक, दुनालेख, डडुल्ले, भण्डारथुम सहितका धार्मिक शक्तिपिठ केन्द्रीत प्रचार अभियान थालनी गरिएको छ ।

जनैपूर्णिमा विशेष बाजुराका दर्जन बढी धार्मिक शक्तिपीठमा एकसाथ मेला लाग्ने गर्दछ । विशेष गरी सामाजिक सञ्जाल मार्फत बडीमालिका र बुढीनन्दा धार्मिक तथा पर्यटकीय क्षेत्रको प्रबर्द्धन केन्द्रीत प्रचार अभियान थालनी गरिएको हाे ।

सिंगो देशकै सम्पत्ति र धर्तीको भू-स्वर्गको रुपमा रहेको बडीमालिकाको महिमा र विशेषताबारे प्रचार गर्ने र तीर्थ यात्रामा आएका र नआएका सबैलाई मेला बारे जानकारी गराउने गरी प्रचार अभियानकाे थालनी गरिएको छ । 

अभियान अन्तर्गत भिडियो, फोटो सहितको सामाग्री सामाजिक सञ्जालमा राख्ने, प्रचार ब्यानर बनाउने, बडीमालिका क्षेत्रको धार्मिक र पर्यटकीय महिमाबारे जानकारी दिने गतिविधि गरिने सचिव प्रेम रौलेले जानकारी दिएका छन् । 

अभियान विशेष गरि सामाजिक सञ्जाल केन्द्रीत हुने बताइएको छ । सुदूरमा लुकेको स्वर्गकै रुपमा रहेको बडीमालिकाको महिमालाई सामाजिक सञ्जाल मार्फत गरिने प्रचार अभियानले विश्व बजारमा प्रबर्द्धन गर्नमा सहयोग पुग्ने महासंघले विश्वास लिएकाे छ ।

नेपाल पत्रकार महासंघ जिल्ला शाखा, बाजुराले २०७३ सालमै बाजुराका प्रमुख पर्यटकीय र धार्मिक गन्तव्य विशेष बुलेट प्रकाशित गरी प्रचारप्रसारका गतिविधि अघि बढाउँदै आएको छ ।

पर्यटकीय महिमाको हिसाबमा देशकै सुन्दर गन्तव्य भएपनि बाजुराकै भूगोलमा अवस्थित बडीमालिकाको प्रबर्द्धन र प्रसारमा जिल्लाको बढी भूमिका र जिम्मेवारी हुने बुझाइ पत्रकार महासंघ बाजुराको छ । 

महासंघले बडीमालिका, बुढीनन्दा लगायतका क्षेत्रको अध्ययन अवलोकन र यसबारे केही दस्ताबेज निर्माणका लागि आउने पर्यटक तथा अन्वेषणकारी टोलीलाई समेत सहजीकरण गर्ने निर्णय गरेको छ ।

बडीमालिका धार्मिक यात्रा विशेष अभियान नै चलाउने गरी निर्णय गरेको महासंघले सबै सञ्चारकर्मी र सञ्चार माध्यमलाई प्रचार प्रसारकै लागि भएपछि दैनिक जसो समाचार र सूचना प्रकाशन र प्रशारण गर्न आग्रह समेत गरेको छ ।