बाजुरा ः नेकपा (एमाले) जिल्ला कमिटी बाजुराका सचिव काँशी विकले पुष्पलाल श्रेष्ठ नेपाली कम्युनिस्ट आन्दोलन र प्रजातान्त्रिक आन्दोलनको धरोहर र एउटा क्रन्तिकारी योद्धा भएको बताएका छन् । उनको ४७ औं स्मृति दिवसका अवसरमा आयोजना गरेको सम्मान र सम्झना कार्यक्रमको सम्बोधन गर्दै उनले यस्तो बताएका हुन् ।

पुष्पलालको विश्व सर्वहारा वर्ग र मजदुर आन्दोलनलाई सर्वात्कृष्ट आन्दोलन बनाउन महत्वपूर्ण योगदान रहेको स्मरण गरेका छन् । पुष्पलालले नेपाली कम्युनिस्ट आन्दोलन र प्रजातान्त्रिक आन्दोलनमा अतुलनीय योगदान रहेको उल्लेख गरेका छन् । माक्सवादलाई पहिलो पटक नेपाल भित्र्याउने श्रेय पुष्पलाललाई जाने विकको भनाई रहेको थियो ।

उनले नेपालमा त्यस प्रकारको क्रूर जहानियाँ राणा शासनको दमनको दबदबा भइरहेको कठिन र जटिल अवस्थामा प्रवासमा बसेर नेकपा स्थापना मात्र गरेनन् वैज्ञानिक समाजवादी व्यवस्था लागु गर्न वर्गविहीन, राज्यविहीन समानतामूलक समाजको परिकल्पना समेत गरेको समेत बताएका थिए ।

सबैखाले शोषण, दमन, अन्याय, अत्याचार र उत्पीडनको अन्त्य गरिए नौलो साम्यवादी संसार निर्माण हुनेछ भनेरै यस्तै खालको राजनीतिक कार्यनीति एवं रणनीतिक योजना तर्जुमा गर्ने पहिलो क्रन्तिकारी योद्धा पनि थिए पुष्पलाल भएको जिकिर गरेका हुन् ।

पुष्पलाल श्रेष्ठको जन्म वि.सं. १९८१ असार १५ गते रामेछाप जिल्लामा पिता भक्तलाल र माता तुलसीकुमारीको माइलो छोराको रूपमा भएको थियो । १९९७ सालमा आफ्नो जेठो दाजु गंगालाल श्रेष्ठ सहितलाई गोली ठोकी मार्नु ठीक एक दिनअघि भद्रगोल जेलमा दाजुलाई भेट्न गएका थिए, पुष्पलाल ।

गंगालालले उनलाई भनेका थिए, ‘माइला ! मैले प्रजातन्त्रको निमित्त बालेको दियोलाई तैंले प्रज्ज्वलित गर्नेछस्, निभ्न दिने छैनस् ।’ त्यतिबेला उनी १६ वर्षको कलिलो उमेरका थिए । दाजुको त्यही भनाइ राजनीतिमा प्रवेश गर्ने प्रेरणाको स्रोत बन्यो ।

वि.सं १९९८ मा पुष्पलाल श्रेष्ठले प्रेमबहादुर कंसाकार, शम्भुराम श्रेष्ठ, सूर्यबहादुर भारद्वाज र राजासँग मिलेर नेपाली प्रजातान्त्रिक संघको गठन गरेका थिए । प्रेस चौतारी नेपाल जिल्ला समिति बाजुराका अध्यक्ष लक्ष्मीराज पाध्यायको अध्यक्षमा औपचारिक कार्यक्रमको आयोजना गरिएको थियो । कार्यक्रमको प्रमुख अतिथि नेकपा (एमाले) जिल्ला कमिटी बाजुराका सचिव काँशी विक रहेका थिए ।

कार्यक्रममा जिल्ला कमिटी सदस्य नरेन्द्र थापा, राजिव रोकाया, बाजुराका क्याम्पस स्ववियु सभापति लक्ष्मण रोकाया, युवा संघ जिल्ला कमिटी सचिव विष्न कार्की, खेलकुद महासंघका अध्यक्ष धनबहादुर रोकाया, नेपाल पत्रकार महासंघ जिल्ला शाखा, बाजुराका अध्यक्ष पदम सिंह लगायत पत्रकार र अन्य नेता कार्यकर्ताहरुको सहभागीता रहेको थियो ।

पार्टी कार्यालयमा आयोजित कार्यक्रममा पार्टी कार्यालयको वरिपरी वृक्षारोपण समेत गरिएको हो । कार्यक्रमको सञ्चालन चौतारी सचिव सुशील रोकायाले गरेका हुन् । पुष्पलाल श्रेष्ठको ४७ औं स्मृति दिवस पार्टी जिल्ला कमिटी, प्रेस चौतारी नेपाल बाजुरा, अनेरास्ववियु र युवा संघले संयक्त आयोजना गरेका हुन् ।