बाजुरा ः बुढीगंगा नगरपालिका-६ बाम्का बजारमा गएको शुक्रबार ग्यास सिलिण्डर पड्किएर आगलागी भएका पीडितलाई उद्योग बाणिज्य संघ बाजुराले राहत सहयोग गरेको छ ।

जिल्लाका विभिन्न ठाउँबाट संकलित रकम आज राहत कोष व्यवस्थापन समितिका संयोजक रामबहादुर बाँनियालाई हस्तान्तरण गरिएको कार्यकारी सचिव टेकबहादुर धामीले बताएका छन् ।

बाजुरा उद्योग बाणिज्य संघ, मार्तडी बजार, कोल्टी बजार, पिलुचौर बजार र धुलाचौर बजार, उद्योग बाणिज्य संघका कार्यसमिति तथा कर्मचारीबाट संकलन भएको ३ लाख ५४ हजार एक सय पचास रुपियाँ हस्तान्तरण गरिएको छ ।

राहतमा पूर्ण क्षति भएका र आंशिक क्षति भएका व्यापारीहरुलाई रकम तोकेर नै हस्तान्तरण गरिएको हो । ग्यास सिलिण्डरबाट आगलागी हुँदा बाम्का बजारका व्यापारीले ठूलो क्षती व्यहोर्नु परेकाले पीडितलाई ढाड्स स्वरुप राहत सहयोग गर्ने महासचिव रमबहादुर शाहीले बताएका छन् ।

बुढीगंगा नगरपालिका र त्रिवेणी नगरपालिकाको संयुक्त बैठकले एकद्धार प्रणालीबाट राहत वितरण गर्न बुढीगंगा नगरपालिकाका नगर प्रमुख रामबहादुर बानियाँको संयोजकत्वमा ११ सदस्यीय समिति गरेको छ ।

समितिले सिद्धार्थ बैंकमा खाता सञ्चालन गरी सोही खातामा रकम जम्मा गरेर राहत वितरण कार्य अघि बढाउने राहत कोष व्यवस्थापन समितिका सदस्य कर्णबहादुर थापाले बताएका छन् । आगलागीका पीडितका लागि राहत विभिन्न ठाउँबाट संकलन हुने क्रम जारी रहेको छ ।