बाजुरा : बुढीगंगा नगरपालिकाले सुत्केरी र गर्भवतीलाई लक्षित गरी स्थापन गरेको उपप्रमुख कोसली कार्यक्रम अन्तरगत पोषणयुक्त खानेकुराहरु दिईएको छ । गर्भवती र शिशु जन्मिएको एक हजार दिनसम्म आमा र बच्चालाई दिईने कोसेली सोमबार उप प्रमुख माया (खड्का) कुवँरले वितरण गरेकी छन् ।

कोसेली कार्यक्रम अन्तरगत उपप्रमुख कुवँरले गर्भवती र सुत्केरीको घर–घरमै पुगेर पोषिला खानेकुरा र सरसफाईका सामाग्रीहरु राखिएका झोला वितरण गर्ने गरेकी छन् । आज वडा नं.१, २ र ३ का गर्भवती र सुत्केरीलाई कोसेली वितरण गरिएको उनले बताएकी छन् ।

तीन वटै वडाका गरी ४९ जना गर्भवती र सुत्केरी महिलालाई पोषिला खानेकुरा वितरण गरिएको उनले बताइन् । कोसेली वितरण कार्यक्रममा वडा नं.१ का अध्यक्ष रणबहादुर थापा, ३ वडाध्यक्ष खडक बहादुर अधिकारी, पालिका स्वास्थ्य शाखा प्रमुख दीपक शाह, तारा कुमारी खत्री लगायतको उपस्थित रहेको थियो । 

नियमअनुसार चार पटक गर्भजाँच गरेका, स्वास्थ्य संस्थामै सुत्केरी भएका महिलाहरुलाई कोसेली दिन थालिएको उनको भनाइ छ । दुर्गम क्षेत्रमा अझैपनि घरमै असुरक्षित रुपमा सुत्केरी हुने, आमा र बच्चाको स्वास्थ्यमा खासै ध्यान नदिने प्रचलन यतावत रहेकाले उनीहरुलाई यसबारे कोसेली कार्यक्रम मार्फत सचेत गराउन थालिएको उनले बताएकी छन् ।

गर्भवती महिलालाई स्वास्थ्य संस्थामै आएर सुत्केरी गराउन तथा आफ्नो र बच्चाको स्वास्थ्यमा ख्याल गर्न प्रेरित गर्ने मुख्य उद्देश्य रहेको उनको भनाइ छ । बच्चालाई तन्दुरुष्ट राख्न पौष्टिक आहार चान्छि, उनले भनिन् गाउँघरमा आमा र बच्चाको ख्यालै गदैनन् उनीहरुलाई केही सहयोग पुग्ने गरी पोषिला खानेकुराहरु वितरण गर्न थालिएको हो ।

उनका अनुसार बच्चाको तौलिया, आयोडिनयुक्त नुन, अण्डा, प्याड, साबुन, मञ्जन, ब्रस, दाल, जवानो लगायत पोषण र सरसफाइका सामाग्री दिने गरिएको छ । कार्यक्रमले आमा र बच्चामा देखिने कुपोषण घटाउने लक्ष्य राखिएको उनको भनाइ छ । 

पोषणको अवस्थालाई सुधार ल्याउन र स्वास्थ्य संस्थामा सुत्केरीको संख्या बढाउनको लागि कोसेली कार्यक्रम प्रभावकारी बन्दै गएको छ । यसका लागि आवश्यक बजेट विनियोजन गरिएको छ । सबै सुत्केरी तथा बच्चा र आमाहरुलाई स्वास्थ्य परीक्षण्को पहुँचमा ल्याउने समेत कार्यक्रमको लक्ष्य रहेको उपप्रमुख कुवँरले बताएकी छन् ।