बाजुरा : दलहरुबीचको आपसी सहकार्य र समृद्विको नारा दिएर बाजुराको बुढीगंगा नगरपालिकाले विकास बहस आयोजना गर्न लागेको छ । पालिकाको समृद्वि र विकासका लागि नयाँ अभ्यास स्वरूप विकास बहस गर्न लागेको हो । भोली वैशाख २७ गतेदेखि २९ गतेसम्म बुढीगंगा नगरपालिकाको केन्द्रमा कार्यक्रमको आयोजना गरिएको नगर प्रमुख रामबहादुर बाँनियाले जानकारी दिएका छन् ।

सबै राजनीतिक दल र सरोकारवालाहरूलाई एकै ठाउँमा ल्याएर बुढीगंगाको विकास र समृद्विको अघि बढाउन “समृद्धिको आधारका लागि बुढीगंगा विकास कचहरी” आयोजना गर्न लागिएको हो ।जिल्लाको विकास निर्माणका लागि जिल्लाको सबै राजनीतिक दल र जनप्रतिनिधि एक ठाउँमा ल्याउने कार्यक्रमको उदेश्य रहेको छ ।

योजना अनुसार नै कार्यक्रमको तयारी तिब्र पारिएको छ । बिहान ११ बजेबाट सुरु हुने कार्यक्रमको तयारी अन्तिम चरणमा पुगेको नगर प्रमुख रामबहादुर बाँनियाले बताएका छन् । ‘बाजुरामा समस्या मात्रै छैन समस्या भन्दा धेरै सम्भावना छ । बाजुरामा विभेद र विवाद मात्रै छैन त्यो भन्दा धेरै एकता र अपनत्व छ ।

बाजुरामा सङ्कट मात्रै छैन त्यो भन्दा धेरै अवसरहरू छन् ’ त्यही कुराको सुरुवादीका लागि कार्यक्रम गर्न लागिएको दाबी पालिकाको छ । स्वास्थ्य, शिक्षा, कृषि, पर्यटन र सुरक्षित पूर्वाधारको सम्भावना तीन दिनको कार्यक्रमले प्रस्ट पार्ने उनले बताए । आगामी २० वर्षसम्मको स्वरूप तयारी गर्ने कार्यक्रम आयोजना गरिएको प्रमुख बानियाको भनाइ छ ।

बाजुराको विकासमा यहाँका राजनीतिक दलहरूको साझा सहमति र बुझाई लगायतका विषयमा बहस तथा संवाद कार्यक्रम हुने छ । विकास कचहरी कार्यक्रममा बुद्धिजीवी, समाजसेवी, राजनीतिक दल, सरकारी तथा गैरसरकारी सङ्घसंस्थाका प्रतिनिधि, पत्रकार र विषयगत क्षेत्रका विज्ञद्वारा अवधारणा पत्र बनाएर सोही अवधारण पत्रका आधारमा संवाद छलफल र बहस गरिने छ ।

स्थानीय तहमा रहेको विकास सम्बन्धी समस्या, आवश्यकता र प्राथमिकतालाई पहिचान गरेर यथार्थमा आधारित समाधानहरू लगायत विषयमा छलफल बहस तथा संवाद गर्ने तयारी छ । सबै राजनीतिक दललाई विकास र संवृद्धिको विषयमा एक ठाउँमा ल्याउन कार्यक्रमले ठुलो भूमिका खेल्ने अपेक्षा गरिएको छ ।

बहसमा प्रमुख राजनीतिकदलबाट संसद र सरकारमा रहेका सहभागी नेता र बौद्विक व्यक्तित्वको सहभागी रहने पालिका उपप्रमुख माया खड्का कुवँरले जानकारी दिएकी छन् । यो जिल्लाकै नयाँ अभ्यास हो ।

केही फरक सन्देश र विकासमा दलीय सहकार्य गर्ने गरी गर्न लागिएको काम प्रति स्थानीयले सकारात्मक प्रतिक्रिया दिएका छन् । कार्यक्रममा पूर्व प्रदेश प्रमुख देवराज जोशी, पूर्व मन्त्री कर्णबहादुर थापा, पूर्व प्रतिनिधि सभा सदस्य लालबहादुर थापा, प्रदेश सभा सदस्य पदम शाही सहित दलका नेता, जनप्रतिनिधि सबै सहभागी हुनेछन् ।